ჩვენ ზუსტად იმიტომ შევედით საქართველოს პარლამენტში, ზუსტად იმიტომ ვართ ადგილობრივი თვითმართველობის ორგანოებში, საკრებულოებში, რომ გამოვიყენოთ ის ტრიბუნები და შესაძლებლობები, რაც სახელმწიფო ორგანოს წევრობა განიჭებს ადამიანს კონსტიტუციით და კანონმდებლობით, – განაცხადა „ნაციონალური მოძრაობის“ წევრმა ირაკლი აბესაძემ პრესკონფერენციაზე.
მისი თქმით, „ნაციონალური მოძრაობა“ გამოიყენებს ყველა მეთოდს, რათა “ამხილოს ივანიშვილის ხელისუფლების უკანონო ზრახვები“.
„ჩვენ, რა თქმა უნდა, ვეღარ დავუშვებთ, რომ გასული 4 წლის განმავლობაში დამკვიდრებული კორუფცია, ისეთივე ტემპებით გაგრძელდეს, როგორც ეს იყო გასული 4 წლის განმავლობაში“,- აღნიშნა აბესაძემ.
აბესაძე, ასევე გამოეხმაურა მიხეილ სააკაშვილის გუშინდელ ვიდეომიმართვას და აღნიშნა, რომ ყოფილი პრეზიდენტი „ივანიშვილის რეჟიმთან საბრძოლველად სახელმწიფო უწყებების გამოყენებაში“ პარლამენტის დეპუტატის, საკრებულოს დეპუტატის თანამდებობრივი სტატუსების შესაძლებლობის გამოყენებას გულისხმობს.
