“ინფორმაცია მაქვს, გია გაჩეჩილაძე აპირებს თქვას, რომ “მაესტროში” 5 მილიონი აქვს დახარჯული”

ტელეკომპანია “მაესტროს” გენერალური დირექტორის, ბაია გადაბაძის ინფორმაციით, მას აქვს ინფორმაცია, რომ “მაესტროს” 55%-იანი წილის მფლობელი გია გაჩეჩილაძე კრედიტორთა კრებაზე გეგმავს განაცხადოს, რომ მას 5 მილიონი დახარჯული აქვს და სწორედ ამიტომ ის არის “მაესტროს” კრედიტორი.
როგორც გადაბაძემ ჟურნალისტებს განუცხადა, მას აქვს ეჭვი, რომ გაჩეჩილაძეები დროის რაღაც მონაკვეთში ცდილობენ პროცესების დასრულებას, თუმცა რატომ, ეს მისთვის გაუგებარია.

რაც შეეხება კითხვას იმის შესახებ, თუ რა უნდა მოხდეს “მაესტროს” კრედიტორთა კრებაზე, გადაბაძემ განმარტა, რომ კრებაზე უნდა დადგინდეს, თუ ვინ არის კრედიტორი, ვინ არის უპირატესი კრედიტორი და ვინ არის უზრუნველყოფილი კრედიტორი. გადაბაძის თქმით, მაკა ასათიანი უპირატესი და უზრუნველყოფილი კრედიტორია.

“ჩემი შეფასებით, გია გაჩეჩილაძე კრედიტორი არ არის. ჩვენ გვაქვს მოლოდინი და მე მაქვს ინფორმაცია, რომ ის აპირებს თქვას – 5 მილიონი აქვს დახარჯული “მაესტროში” და ის არის კრედიტორი. მას არა აქვს არანაირი დოკუმენტაცია და უბრალოდ მოჰყავს მოწმე, რაც ასევე ჩემი აზრით, უსუსური არგუმენტია. ყველას შეუძლია თქვას, რომ ტელეკომპანიაში ფული აქვს დახარჯული და უნდა იყოს კრედიტორი. თუკი მაკა ასათიანის მიერ დახარჯული თანხა დგას კითხვის ნიშნის ქვეშ, რომელსაც აქვს საბანკო ტრანზაქციების დამადასტურებელი დოკუმენტები, მაშინ გაჩეჩილაძის მოწმე ასევე კითხვის ნიშნის ქვეშ უნდა დადგეს. თუ სასამართლო ამას მიიღებს, მოწმეს მიიღებს ამის არგუმენტად, სწორედ აქ გამოვლინდება ხელისუფლებისა და სასამართლოს არაობიექტურობა, რადგან არ შეიძლება მხოლოდ მოწმის საფუძველზე აღიარონ პირი კრედიტორად”, – განაცხადა ბაია გადაბაძემ.

“მაესტროს” გენერალურმა დირექტორმა გაჩეჩილაძეების ადვოკატის, ირაკლი კორძახიას განცხადებებსაც უპასუხა და კორძახიას ურჩია არ ინერვიულოს, ვინაიდან გადაბაძის თქმით, ჯობია კორძახიამ კვალიფიკაცია აიმაღლოს.

“არც მე და არც ჩვენს იურიდიულ სამსახურს კორძახიას უცნაურ კითხვებზე პასუხები არ გვაქვს”, – აღნიშნა ბაია გადაბაძემ.

banner
წინა სტატიაშითბილისის აეროპორტში მამაკაცს სატვირთო დაეჯახა და გარდაიცვალა
შემდეგი სტატია“ენა რომლითაც ტოლსტოი დოსტოევსკი და პუშკინი მეტყველებდა, რუსული პროპაგანდა არაა”