უკრაინის ხელისუფლებას შეუძლია საქართველოს ექს-პრეზიდენტის, პარტია “Рух нових сил”-ის ლიდერის მიხეილ სააკაშვილის დეპორტაცია განახორციელოს საქართველოში, პოლონეთში ან ნიდერლანდებში. ამის შესახებ ინფორმაცია გამოცემა “РБК-Украина”-ს რამდენიმე წყარომ მიაწოდა.
“არის სამი ვარიანტი: საქართველო, პოლონეთი და ნიდერლანდები”, – განუცხადა გამოცემას დამოუკიდებელმა წყარომ სააკაშვილის გარემოცვიდან. ხელისუფლება განიხილავს ნიდერლანდებს იქიდან გამომდინარე, რომ მისი მეუღლე ამ ქვეყნის მოქალაქეა, პოლონეთს – იმის გამო, რომ სწორედ ამ ქვეყნიდან შემოვიდა იგი უკრაინაში, საქართველოს კი იმ მოტივით, რომ მის წინააღმდეგ სისხლის სამართლის საქმეა აღძრული.
წყარო უკრაინის პარლამენტიდან აცხადებს, რომ ყველაზე დიდი ალბათობით სააკაშვილის დეპორტაცია ნიდერლანდებში განხორციელდება.
“სააკაშვილს ჰოლანდიაში გააძევებენ. საქართველოში – არ შეიძლება. პოლონეთი, საიდანაც იგი ბოლოს შემოვიდა, წინააღმდეგია. ამიტომ გადაწყდა, რომ მისი დეპორტაცია განხორციელდეს ქვეყანაში, სადაც ცხოვრობენ მისი ნათესავები”,- აღნიშნა წყარომ.
დღეს მიხეილ სააკაშვილმა განაცხადა, რომ მიგრაციის სამსახურმა გაუხანგრძლივა მას უკრაინაში ყოფნის ვადა სამი თვით.