ნატო-ს გენერალური მდივანის, იენს სტოლტენბერგის განცხადებით, ალიანის ნებისმიერ წევრზე თავდასხმას ერთიანი და ძლიერი პასუხი მოჰყვება.
ამის შესახებ სტოლტენბერგმა აშშ-ის ყოფილი პრეზიდენტის, დონალდ ტრამპის განცხადების შემდეგ ისაუბრა.
„ნებისმიერი ვარაუდი იმის შესახებ, რომ მოკავშირეები ერთმანეთს არ დაიცავენ, ძირს უთხრის მთელ ჩვენს უსაფრთხოებას, მათ შორის აშშ-ს და მზარდი რისკის ქვეშ აყენებს ამერიკელ და ევროპელ ჯარისკაცებს. მიუხედავად იმისა, ვინ გაიმარჯვებს საპრეზიდენტო არჩევნებში, ველოდები, რომ აშშ დარჩება ნატო-ს ძლიერ და ერთგულ მოკავშირედ“, – აღნიშნა ნატო-ს გენერალურმა მდივანმა.
სტოლტენბერგმა დასძინა, რომ ნატო-ს „შეუძლია, დაიცვას ყველა მოკავშირე“.
შეგახსენებთ, სამხრეთ კაროლინაში 2024 წლის საპრეზიდენტო არჩევნების კამპანიის მსვლელობისას დონალდ ტრამპმა განაცხადა, რომ ის წაახალისებდა რუსეთს, რათა თავს დასხმოდა ნატო-ს ნებისმიერ წევრს, რომელიც არ გადაიხდიდა გადასახადებს, როგორც დასავლური სამხედრო ალიანსის ნაწილი.
