იაპონიაში ვადამდელი საპარლამენტო არჩევნები მიმდინარეობს, – ინფორმაციას Reuters-ი ავრცელებს.
იაპონიის პრემიერ-მინისტრის, სანაე ტაკაიჩის მიერ დანიშნული ვადამდელი საპარლამენტო არჩევნებისთვის საარჩევნო უბნები დღეს დილით გაიხსნა.
წინასწარი გამოკითხვების თანახმად, მმართველი „ლიბერალურ-დემოკრატიული პარტია“ დამაჯერებელი გამარჯვების მოპოვებას შეძლებს და იაპონიის პარლამენტის 465 ადგილიან ქვედა პალატაში 300-მდე მანდატს მიიღებს.
იაპონიაში არჩევნები დიდთოვლობის ფონზე მიმდინარეობს. თოვლმა ტოკიოში საგზაო შეფერხებები გამოიწვია. ასევე, უამინდობის გამო ქვეყნის მასშტაბით 54 ავიარეისი გაუქმდა.
ცნობისთვის, „ლიბერალურ-დემოკრატიული პარტიის“ ლიდერი, სანაე ტაკაიჩი იაპონიის პრემიერ-მინისტრი 2025 წლის ოქტომბერში გახდა. ტაკაიჩიმ პარლამენტი გასულ თვეში დაითხოვა და ვადამდელი არჩევნები დანიშნა. იაპონიის პრემიერ-მინისტრმა იმედი გამოთქვა, რომ პარტია ვადამდელი საპარლამენტო არჩევნების შედეგად ქვეყნის მართვისთვის უფრო ძლიერ მანდატს მიიღებს.
