აშშ-ის თავდაცვის მდივანმა, პიტ ჰეგსეთმა პენტაგონში გამართულ ბრიფინგზე სენსაციური განცხადება გააკეთა. მისი თქმით, ვაშინგტონი ფლობს ზუსტ ინფორმაციას რუსეთისა და ჩინეთის კოორდინირებულ ქმედებებზე ირანის სასარგებლოდ და ამ საკითხზე მუშაობს.
ჰეგსეთმა უპასუხა კითხვას იმ ცნობების შესახებ, რომლის მიხედვითაც რუსეთი და ჩინეთი ირანს აწვდიან სადაზვერვო მონაცემებს რეგიონში აშშ-ის ჯარების გადაადგილების შესახებ. „ჩვენ ზუსტად ვიცით, რას აკეთებენ ისინი. ჩვენ ამას ვპასუხობთ“, — აღნიშნა მდივანმა.
თავდაცვის მდივანმა დაადასტურა პრეზიდენტ ტრამპის პოზიცია, რომ სრუტე სრულად უნდა გაიხსნას, თუმცა ხაზი გაუსვა, რომ ამ პროცესში სხვა ქვეყნებმაც უნდა მიიღონ მონაწილეობა.
აშშ-ის გაერთიანებული შტაბების თავმჯდომარემ, გენერალმა დენ ქეინმა განმარტა, რომ რეგიონში დისლოცირებული ათასობით საზღვაო ქვეითი მხოლოდ სახმელეთო ინტერვენციისთვის არ არის განკუთვნილი. მისი თქმით, ძალების გამოყენება სხვადასხვა ამოცანებისთვისაა შესაძლებელი, რაც მიზნად ისახავს სპეკულაციების გაფანტვას გარდაუვალი ფართომასშტაბიანი შეტევის შესახებ.
პენტაგონის ეს გზავნილები მიანიშნებს, რომ აშშ ემზადება არა მხოლოდ ირანთან, არამედ იმ გლობალურ ალიანსთან დასაპირისპირებლად, რომელიც თეირანის ზურგს უკან დგას.
