აშშ-ის ომის მინისტრი, პიტ ჰეგსეთი აცხადებს, რომ ირანს აქვს შანსი, კარგი, გონივრული გარიგება დადოს.
მისი თქმითვე, ირანს ბირთვული იარაღი აღარ ექნება.
ჰეგსეთმა ხაზი გაუსვა, რომ აშშ-ის საზღვაო ძალების მიერ ირანის პორტებზე დაწესებული ბლოკადა „დღითიდღე უფრო და უფრო ძლიერდება“.
მისი თქმით, აშშ-ის საზღვაო ძალები ბლოკადას „ყოყმანისა და ბოდიშის მოხდის გარეშე“ ახორციელებენ.
„ეს მოიცავს ყველა გემს, რომელიც ჩვენს კრიტერიუმებს აკმაყოფილებს. ირანულ გემებს, ან ირანის პორტებში მიმავალ და იქიდან მომავალ გემებს“, – აღნიშნა ჰეგსეთმა.
მისი თქმით, დღეს დილის მონაცემებით, სულ ოცდათოთხმეტი გემი გააბრუნეს.
ჰეგსეთმა აღნიშნა, რომ აშშ-მა ამ კვირაში ინდო-წყნარი ოკეანის რეგიონში ირანის ფლოტის ორი გემი დააკავა და დასძინა: „კიდევ ბევრს დავაკავებთ“.
ამასთან, აშშ-ის ომის მინისტრის თქმით, ჰორმუზის სრუტე ევროპას უფრო მეტად სჭირდება, ვიდრე შეერთებულ შტატებს.
„ჩვენ ევროპას არ ვეყრდნობით, მაგრამ მათ ჰორმუზის სრუტე ჩვენზე მეტად სჭირდებათ. ეს ბევრად უფრო მათი ბრძოლაა, ვიდრე ჩვენი“, – აღნიშნა ჰეგსეთმა
