ჰარცელი საპატრიარქოში შეხვედრის შემდეგ: განვიხილეთ ნაბიჯები, რათა ბავშვების კეთილდღეობა იყოს უზრუნველყოფილი

ყველამ ვნახეთ ბოლო დღეებში ნინოწმინდის ბავშვთა პანსიონში მიღწეული პროგრესი, განვიხილეთ ნაბიჯები, რათა ბავშვების კეთილდღეობა იყოს უზრუნველყოფილი, – ამის შესახებ საქართველოში ევროკავშირის ელჩმა, კარლ ჰარცელმა საპატრიარქოში გამართული შეხვედრის შემდეგ განაცხადა, რომელსაც ჯანდაცვის მინისტრი ეკატერინე ტიკარაძე და „იუნისეფის“ წარმომადგენელიც ესწრებოდნენ.

მისი თქმით, შეხვედრაზე საუბარი ეხებოდა ნინოწმინდის პანსიონში მიმდინარე პროცესებს.

„ახლახან დავესწარი შეხვედრას, რომელიც საპატრიარქოს, სამინისტროს და ჯანდაცვის მუშაკების მონაწილეობით გამართული ჩვენი წინა შეხვედრის გაგრძელებაა, რომელსაც ასევე ესწრებოდა იუნისეფი და ვორლდ ვიჟენი. პირველ ყოვლისა, განვიხილეთ ვითარება ნინოწმინდაში. ვფიქრობ, ყველამ ვნახეთ ბოლო დღეებში მიღწეული პროგრესი, ვგულისხმობ ნინოწმინდის პანსიონიდან ბავშვების უმეტესობის დეინსტიტუციონალიზაციას და იქ დარჩენილი არასრულწლოვნების მონიტორინგს, რომელიც გრძელდება. ახლა ვხედავთ ღიაობასა და გამჭვირვალობას, რაც აუცილებლად არის საჭირო და ძალიან კარგია. განვიხილეთ ნაბიჯები, რათა უზრუნველყოფილი იყოს ფოკუსი ბავშვების კეთილდღეობაზე. ჩვენ ასევე გვქონდა შესაძლებლობა, გვემსჯელა უფრო ფართო საკითხებზე, რომელიც უკავშირდება დეინსტიტუციონალიზაციას. არსებობს გაერთიანებული ინტერესი, რომ წინ წავიწიოთ, ეს ყველა მხარისგან ვიგრძენი. იქნება სხვადასხვა ქმედება, რათა დისკუსია წინ წავიდეს და ასევე ნარატივი, თუ როგორ უნდა გამოვიყენოთ ეს მომენტი, რათა ამ გადამწყვეტ საკითხზე რეალური ნაბიჯები გადავდგათ წინ.

პარალელურად, ვნახე, რომ პარლამენტი ემზადება სამუშაო ჯგუფის შესაქმნელად ბავშვთა დაცვის კოდექსზე, რაც მისასალმებელი ფაქტია. ვფიქრობ, პარლამენტის როლი ამ პროცესში იქნება ძალიან სასარგებლო. ევროკავშირის მხრიდან ჩვენ უკვე ჩართულები ვართ და მოწადინებული ვართ პროცესის მხარდაჭერის გასაგრძელებლად. დღევანდელ შეხვედრაზე დისკუსია იყო ძალიან კარგი და სასარგებლო. ჩვენ ვიმსჯელეთ მიღწეულზე და დავსახეთ სამომავლო ამოცანები“, – განაცხადა კარლ ჰარცელმა.

banner
წინა სტატიაში“პარტიებმა, რომლებმაც ხმა მისცეს „ლეიბორისტული პარტიის“ აკრძალვას, დაამთავრეს ოპოზიციური სტატუსით მანიპულირება”
შემდეგი სტატიათაკო ჩარკვიანი: მოვიქეცი, როგორც პატიოსანი დეპუტატი