სტრასბურგში ევროსაბჭოს საპარლამენტო ასამბლეის საგაზაფხულო სესია დღეს იხსნება. სესიას ქართული დელეგაციაც დაესწრება. რაც შეეხება საქართველოს მთავრობის მეთაურს, გიორგი კვირიკაშვილი ევროსაბჭოს საპარლამენტო ასამბლეის საგაზაფხულო სესიაზე ევროპელ დეპუტატებს 21 აპრილს მიმართავს. არსებული ინფორმაციით, პრემიერი საქართველოში მიმდინარე რეფორმებთან დაკავშირებით ისაუბრებს. სესიაზე კითხვებს უპასუხებს ევროკომისის პრეზიდენტს ჟან კლოდ იუნკერი.
როგორც ”ნაციონალური მოძრაობის” წევრმა, დეპუტატმა გიორგი კანდელაკმა ჟურნალისტებს განუცხადა, მნიშვნელოვანია, რამდენად შეძლებს საქართველოს პრემიერი კრიტიკული დამოკიდებულება გააქარწყლოს.
”გამოდის პრემიერ-მინისტრის მოვალეობის ფორმალური შემსრულებელი და დეპუტატები დაუსვამენ კითხვებს წინაასარჩევნო პერიოდთან დაკავშირებით. მნიშვნელოვანია, რამდენად შეძლებს პრემიერი გააქარწყლოს კრიტიკული დამოკიდებულება, რომელიც იყო და არის ევროპაში”, – განაცხადა გიორგი კანდელაკმა.
”თავისუფალი დემოკრატების” წევრმა, დეპუტატმა ირაკლი ჩიქოვანმა კი განაცხადა, რომ სესიის განმავლობაში დაგეგმილია რამდენიმე მნიშვნელოვანი საკითხის განხილვა. იმ შემთხვევაში კი, თუ მას იუნეკერისთვის კითხვის დასმის საშუალება მიეცემა, ირაკლი ჩიქოვანი ვიზალიბერალიზაციის საკითხით დაინტერესდება.
”იუნკერის გამოსვლა მნიშვნელოვანია. ჩვენ გვექნება კითხვები, რა თქმა უნდა, თუ მოგვეცა მათი დასმის შესაძლებლობა. ეს არის საქართველოსთვის უვიზო მიმოსვლის შესაძლებლობის მიცემა. ჩვენ გვაინტერესებს კონკრეტულად არსებობს თუ არა რაიმე სახის ნებისმიერი ტექნიკური შეფერხება, თუმცა რამდენადაც ჩვენთვის ცნობილია, ასეთი რამ არ არსებობს და გვაინტერსებს, რა მოლოდინი აქვს მას პოლიტიკური გადაწყვეტილების მიღების თვალსაზრისით ამ ყველაფერთან დაკავშირებით”, -განაცხადა ირაკლი ჩიქოვანმა.
რაც შეეხება სესიის თემებს, არსებული ინფორმაციით, საუბარი შეეხება ”ისლამურ სახელმწიფოსთან” და ზოგადად ტერორიზმთან ბრძოლას, ასევე მიგრანტთა კრიზისს. დღეს გახდება ცნობილი იმსჯელებენ თუ არა არაღიარებული მთიანი ყარაბაღის და ნადეჟდა სავჩენკოს საკითხზე.
