გიორგი კახიანი: რეალობა არის ოფიციალურ სტატისტიკაში და ამ თვალსაზრისით დანაშაულთა რაოდენობა არის მნიშვნელოვნად შემცირებული

region
ავტ.: region ოქტომბერი 23, 2020 15:04

გიორგი კახიანი: რეალობა არის ოფიციალურ სტატისტიკაში და ამ თვალსაზრისით დანაშაულთა რაოდენობა არის მნიშვნელოვნად შემცირებული

„ოფიციალური სტატისტიკის მიხედვით და, რა თქმა უნდა, ჩვენ ამ სტატისტიკას უნდა ვენდოთ, დანაშაულთა გარკვეულ კატეგორიებზე, განსაკუთრებით მძიმე დანაშაულებზე, ეს სტატისტიკა არის შემცირებული“, – განაცხადა პარლამენტის თავმჯდომარის მოადგილემ გიორგი კახიანმა ზოგიერთი მედია საშუალების მიერ გავრცელებული იმ ინფორმაციის შეფასებისას, თითქოს კრიმინალთან დაკავშირებით არსებული რეალობა არ შეესაბამება სტატისტიკურ ინფორმაციას.

მისი თქმით, ძალიან დიდი მნიშვნელობა აქვს იმას, თუ როგორ აშუქებს მედია ამა თუ იმ დანაშაულს.

„როდესაც გაუთავებლად ხდება დანაშაულების გაშუქება, ასე ვთქვათ, ერთ-ერთი მთავარი ნაწილი ბევრი საინფორმაციო გამოშვების სწორედ ეს არის – სხვადასხვა დანაშაულების გაშუქება, ცხადია ეს იმდაგვარ განცდასაც ქმნის, რომ შესაძლოა დანაშაული იყოს გაზრდილი, თუმცა ოფიციალური სტატისტიკის მიხედვით და, რა თქმა უნდა, ჩვენ ამ სტატისტიკას უნდა ვენდოთ, დანაშაულთა გარკვეულ კატეგორიებზე, განსაკუთრებით მძიმე დანაშაულობებზე, ეს სტატისტიკა არის შემცირებული“, – განაცხადა პარლამენტის ვიცე-სპიკერმა.

გიორგი კახიანის განცხადებით, რეალობის შესაქმნელად ხშირად მედია საშუალებებს საკმაოდ დიდი მნიშვნელობა აქვს, და იმ პირობებში, როდესაც მუდმივად შუქდება შემთხვევები, იქნება ეს მკვლელობის, ყაჩაღობის და ა. შ., ბუნებრივია, შესაძლოა რეალობაც ისე გამოჩნდეს, რომ სტატისტიკურად მომატებულია დანაშაული, თუმცა ამის პარალელურად არსებობს ოფიციალური სტატისტიკა და საზოგადოებამ ამ სტატისტიკას უნდა დაუჯეროს.

„ოფიციალური სტატისტიკა გულისხმობს იმას, რომ მაგალითად განსაკუთრებით მძიმე დანაშაულები, ისეთი როგორიც არის ყაჩაღობები, 2012 და 2019 წლებში სამჯერ უფრო ნაკლები დანაშაული არის მომხდარი ვიდრე, ვთქვათ, ეს იყო 2003-2012 წლებში. იგივე სტატისტიკა არის, მაგალითად, მკვლელობებთან, მკვლელობის მცდელობებთან მიმართებაში. დაახლოებით 2,5-ჯერ, 3-ჯერ არის ეს სტატისტიკა შემცირებული.

რა თქმა უნდა, ჩვენ უნდა დავუჯეროთ ამ სტატისტიკას. თუმცა ფაქტია ისიც, რომ ასეთი შემთხვევები თუ ადრე არ შუქდებოდა, დღეს ამას, განსაკუთრებით ზოგიერთი მედია საშუალება, რომლებისთვისაც როგორც ჩანს პირდაპირი ინტერესი არის ასეთი სურათის დახატვა და აპოკალიფსური სურათის შექმნა, როგორც ჩანს ამ პოლიტიკიდან გამომდინარე, სწორედ მეტი დრო ეთმობა ასეთი დანაშაულობების, ქმედებების გაშუქებას, ამიტომ შესაძლოა ვინმეს ასეთი განცდაც შეექმნას, რომ დანაშაულების სტატისტიკა არის გაზრდილი.

თუმცა რეალობა არის ოფიციალურ სტატისტიკაში და ამ თვალსაზრისით დანაშაულთა რაოდენობა, ვგულისხმობ განსაკუთრებით მძიმე დანაშაულებს, მაგალითად როგორიც არის ყაჩაღობა, მკვლელობა, მკვლელობის მცდელობები, ეს სტატისტიკა არის შემცირებული. ამასთანავე, არის გარკვეული დანაშაულობები, რომელთა შემთხვევაში შესაძლოა გაზრდილიც იყოს სტატისტიკა, მაგალითად, ოჯახურ დანაშაულობებთან დაკავშირებით.

ადრე შესაძლოა საერთოდ არ კეთდებოდა ასეთი სტატისტიკა ოჯახურ დანაშაულობებთან მიმართებაში, დღეს იცით, რომ ამას სახელმწიფო განსაკუთრებულ ყურადღებას აქცევს და ამ თვალსაზრისით, აქ შესაძლოა გაზრდილიც იყოს სტატისტიკა, თუმცა რაც შეეხება ისეთ მძიმე დანაშაულებს, რომლებზეც მე უკვე ვისაუბრე, ამ ნაწილში შემცირებულია სტატისტიკა“, – განაცხადა გიორგი კახიანმა.

region
ავტ.: region ოქტომბერი 23, 2020 15:04