იმ პოლიციელების წინააღმდეგ, ვინც ჩემს დაკავებაში მონაწილეობდა, გამართლების შემთხვევაში აუცილებლად შევიტან სარჩელს, – ამის შესახებ ნარკოდანაშაულში ბრალდებულმა მსახიობმა გიორგი გიორგანაშვილმა (ბახალა) დღევანდელი სხდომის დასრულების შემდეგ განაცხადა.
მისი თქმით, პროკურატურის პოზიცია აბსურდულია, შესაბამისად ის გამამართლებელი განაჩენის მოლოდინშია. დღევანდელ პროცესზე ბრალდებულმა გიორგანაშვილმა დასკვნითი სიტყვა წარმოთქვა, სადაც მისი დაკავების დეტალებზე ისაუბრა. გიორგანაშვილმა აღნიშნა, რომ ადგილი ჰქონდა პოლიციელების მხრიდან ფსიქოლოგიურ და სიტყვიერ ზეწოლას.
შემდეგი სასამართლო სხდომა 23 იანვარს 14:30 საათზე გაიმართება.
მსახიობ გიორგი გიორგანაშვილს ბრალი განსაკუთრებით დიდი ოდენობით ბუპრენორფინის ფლობისთვის წაუყენეს. ბრალის დამტკიცების შემთხვევაში მას 8-დან 20 წელამდე ან უვადო პატიმრობა ემუქრება. თავად ბრალდებული წარდგენილ ბრალს არ აღიარებს.