მოსკოვში კინორეჟისორ გიორგი დანელიას ემშვიდობებიან. სამოქალაქო პანაშვიდი მოსკოვის კინოს სახლში მიმდინარეობს.
რუსული მედიის ცნობით, პანაშვიდს საქართველოს პრემიერ-მინისტრის სპეციალური წარმომადგენელი ზურაბ აბაშიძე დაესწრო და საქართველოს პრეზიდენტის, სალომე ზურაბიშვილის სახელით სამძიმრის წერილი წაიკითხა. წაიკითხეს ასევე საქართველოს კათოლიკოს-პატრიარქის, ილია მეორის სამძიმარი.
„მის შემოქმედებაში თითქმის ყველა ქვეყნის, ყველა ეროვნების წარმომადგენელი თავისთვის ახლობელ გარემოს ნახულობს, რაც სიკეთისა და სიყვარულის, ერთგულებისა და ამასთან, ადამიანური სისუსტეების სევდანარევი ღიმილით წარმომჩენ ხელოვანს თავისთავად მსოფლიო კულტურის განუყოფელ ნაწილად აქცევს“, – აღნიშნულია პატრიარქის სამძიმარში.
ცერემონიაზე „დემოკრატიული მოძრაობის“ ლიდერი ნინო ბურჯანაძეც მივიდა. გიორგი დანელია 4 აპრილს, 88 წლის ასაკში გარდაიცვალა. მას დღეს ნოვოდევიჩის სასაფლაოზე დაკრძალავენ.