გიგი უგულავა შინაგან საქმეთა სამინისტროს ადმინისტრაციულ შენობაში გამოცხადდა. ის უწყებაში უზენაესი სასამართლოს განაჩენის აღსრულების მიზნით დაიბარეს.
„აბა თქვენ იცით! დროებით!“, – ამ სიტყვებით დაემშვიდობა ის მხარდამჭერებსა და ახლობლებს.
შესაბამისი პროცედურების გავლის შემდეგ, სამართალდამცველები ოპოზიციონერ ლიდერს სასჯელაღსრულების შესაბამის დაწესებულებაში გადაიყვანენ.
უზენაესმა სასამართლომ გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 3 წლითა და 2 თვით თავისუფლების აღკვეთა შეუფარდა.
პროკურატურა გიგი უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლაგვას ედავებოდა. 2018 წელს საქალაქო სასამართლომ ყოფილ მერს აღნიშნულ საქმეზე 1 წლითა და 3 თვით თავისუფლების აღკვეთა შეუფარდა, თუმცა სხვა საქმეზე გამოტანილმა განაჩენმა ახალი განაჩენი შთანთქა და სასამართლომ სასჯელი მოხდილად ჩაუთვალა.
