მამუკა მდინარაძის მიერ თანამდებობის დატოვება და პოლიტიკიდან წასვლა სინამდვილეში ირაკლი კობახიძის იზოლაციასა და მისი პოლიტიკური გავლენების შესუსტებას უკავშირდება — ამის შესახებ “ინტერპრესნიუსის” ცნობით, პოლიტოლოგმა გია ხუხაშვილმა განაცხადა.
ხუხაშვილის შეფასებით, მიმდინარე პროცესები მმართველი გუნდის შიგნით არსებული კრიზისის ლოგიკური გაგრძელებაა, სადაც მთავარი სამიზნე თავად პრემიერ-მინისტრია.
„ეს არის ლოგიკური გაგრძელება იმ პროცესების, რაც მიმდინარეობს. მდინარაძე ნაკლებად საინტერესოა — მისი ეს ბოლო ეპიზოდები კომიკურ ხასიათს ატარებდა და გასაგები იყო, რითაც დაასრულებდა. მაგრამ აქ მთავარი კითხვა კობახიძის მიმართ ისმის — ვისი პრემიერ-მინისტრია კობახიძე?! ერთადერთი დაქვემდებარებული, ვინც ჰყავდა, იყო მდინარაძე, მეტი მთავრობაში მის დაქვემდებარებაში აღარავინ არის.
ის არის ერთგვარად სახლში მარტოდ დარჩენილი ბავშვი, რომელსაც შეუძლია მარტო გააფუჭოს, გაკეთების საშუალებას იქ არავინ მისცემს. შესაბამისად, მდინარაძის გადადგომა არის კობახიძის საბოლოოდ დაცურების პრელუდია, ერთგვარი ანონსი. ბიძინა დიდხანს მარტოს სახლში მას არ დატოვებს“, — აცხადებს ხუხაშვილი.
პოლიტოლოგის თქმით, მთავრობა ფაქტობრივად ტექნიკურია და მასში პოლიტიკური კომპონენტი აღარ დარჩენილა, რადგან პრემიერს უწყებაში არავინ ემორჩილება.
„კობახიძე ისედაც დიდი ხანია გამზადებულია ‘ჩასარეცხად’. ბიძინა ივანიშვილმა, ბუნებრივია, მას უნდა აჰკიდოს ის ცოდვები, რაც ბოლო period-ში დაგროვდა და ამ ცოდვებთან ერთად უნდა გაისტუმროს.
მდინარაძის მთელი ეს ისტორია და ოდისეა უკავშირდებოდა კობახიძის სტერილიზაციის პროცესს. დღეს შექმნილია სიტუაცია, როდესაც კობახიძე რეალურად არაფერს აკონტროლებს — ერთადერთი ადამიანი, ვისაც შეეძლო დალაპარაკებოდა მთავრობაში, მდინარაძე იყო. მდინარაძის გადადგომა არაფერს ნიშნავს, ეს არის პრელუდია კობახიძის ჩარეცხვის“, — აღნიშნა გია ხუხაშვილმა.
შეგახსენებთ, რომ მამუკა მდინარაძემ საგანგებო ბრიფინგზე განაცხადა, რომ რეგიონული განვითარების მინისტრის პოსტს ტოვებს და პოლიტიკიდან მიდის. მისი თქმით, აღნიშნულ გადაწყვეტილებაზე ბოლო რამდენიმე კვირის განმავლობაში ფიქრობდა.
