ღუდუშაური – პარტნიორები ერთმანეთს სანქციებითა და შეზღუდვით არ უნდა ელაპარაკებოდნენ

პარტნიორები, მით უმეტეს, სტრატეგიული პარტნიორები ერთმანეთს სანქციებითა და შეზღუდვით არ უნდა ელაპარაკებოდნენ, ეს ყველაფერი კონტრპროდუქტიული იქნება, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

ღუდუშაური იმედოვნებს, რომ აშშ-ის ელჩი ყველაფერს გააკეთებს აშშ-საქართველოს ურთიერთობების გადასატვირთად.

„ამერიკის შეერთებული შტატები და ამერიკელი ხალხი არის მეგობარი, პარტნიორი. იმედს ვიტოვებთ, რომ ასეთი მიდგომა გადაიხედება. რაც შეეხება ვიზების საკითხს, არ ვიცი, ვის მიუვიდა მსგავსი შეტყობინება, რომ ვისაც ვიზა არ აქვს, მას ვერ მიიღებსო. სხვა არაფრის თქმა არ შეგვიძლია, გარდა იმისა, რომ ეს ნაბიჯი დააზიანებს და ხელს არ შეუწყობს იმ ურთიერთობას, რაც ჩვენს ქვეყანას აქვს გაცხადებული. საქართველო ამერიკას პარტნიორ ქვეყნად მიიჩნევს, ამერიკელი ხალხი ქართველების მეგობარია და პირიქით. შესაბამისად, ასეთი ნაბიჯები გულდასაწყვეტია და ვისურვებდი, რომ ვითარების შეფასება რეალურად მოხდეს. ელჩმა თავად თქვა, რომ საქართველო-ამერიკის ურთიერთობებისთვის ყველაფერს გააკეთებდა. იმედია, ელჩი თავის სიტყვას შეასრულებს, ყველაფერს გააკეთებს, რომ პარტნიორები ერთმანეთს ასეთი ფორმით არ ესაუბრებოდნენ და ეს ურთიერთობა გადაიტვირთება. ურთიერთობის გადატვირთვის შემდეგ არ უნდა იყოს სივრცე იმასა, რომ ერთმანეთს რაღაც სანქციებით, შეზღუდვებით ვესაუბროთ.

ვიზა მაქვს, რატომ არ უნდა მიყვარდეს მოგზაურობა? მათ შორის, ამერიკაში, მაგრამ უფრო მეტად მიყვარს ჩემი ქვეყანა, განსხვავებით ბევრი ვაიოპოზიციონერისგან, რომლებიც დარბოდნენ და ამბობდნენ, ვიღაცას სანქცია დაედება და ვერ იმოგზაურებსო. ბევრი ქვეყანაა საინტერესო და ნეტავ მოგზაურობის დრო მქონდეს. ვინ სად იმოგზაურებს, ვინ რას მიირთმევს, რას ჩაიცვამს, ეს თქვენი საქმე არ არის. 26 ოქტომბერს ქართველ ხალხთან ერთად ვიზეიმებთ გამარჯვებას. სხვათა შორის, 26 ოქტომბერს დაბადების დღე მაქვს“, – განაცხადა ღუდუშაურმა.

banner
წინა სტატიაშიშინაგან საქმეთა სამინისტრომ ნარკოდანაშაულისთვის 27 პირი დააკავა, მათ შორის 15 ნარკორეალიზატორია
შემდეგი სტატიამოსკოვის სასამართლომ ყოფილი პარლამენტარი ქეთევან ხარაიძე წინასწარი პატიმრობიდან გაათავისუფლა