დღეს ვდგავართ არჩევანის წინაშე, ფოთი ირჩევს ახალგაზრდა, წესიერ ადამიანს, რომელიც მოემსახურება თავის ფოთს და ფოთელებს, მეორე მხრივ, არის კორუმპირებული, მართლაც დეგრადირებული პოლიტიკოსი, მარგინალიზებული გიგი უგულავა, – ამის შესახებ პრემიერ-მინისტრმა, ირაკლი ღარიბაშვილმა ფოთის მერობის კანდიდატის, ბექა ვაჭარაძის წარდგენისას განაცხადა.
მან ფოთში ოპოზიციის ნაწილის მერობის კანდიდატი, გიგი უგულავა გააკრიტიკა და აღნიშნა, რომ ის „ელიტური კორუფციის ერთ-ერთი მთავარი ფუძემდებელია“.
„ნათქვამია, „ძალაუფლება რყვნის ადამიანსო“ და ჩვენ, რაც გვინახავს ბოლო წლების განმავლობაში, პოლიტიკაში მრავლად ვნახეთ ასეთი გარყვნილი პოლიტიკოსები. არ მოვერიდები ამის თქმას, ვინაიდან ვიცით, რომ ჩვენ დღეს ვდგავართ არჩევანის წინაშე, ფოთი ირჩევს ახალგაზრდა, წესიერ ადამიანს, რომელიც მოემსახურება თავის ფოთს და ფოთელებს, მეორე მხრივ, არის კორუმპირებული, მართლაც დეგრადირებული პოლიტიკოსი, მარგინალიზებული გიგი უგულავა. ძალიან მაინტერესებს, რა უნდა ამ ადამიანს ფოთში, რატომ მოდის ფოთში, კაცი, რომელიც არის ცნობილი ძარცვით და თანამედროვე ისტორიას თუ გადავხედავთ, ერთ-ერთი ყველაზე თვალსაჩინო კორუფციონერია, ელიტური კორუფციის ერთ-ერთი მთავარი ფუძემდებელი. მძარცველი პოლიტიკოსი და პოლიტიკოსის იმიჯის, სტატუსით მოსიარულე. შესაბამისად, არჩევანის გაკეთება ძალიან მარტივია – ჩვენს მოქალაქეებს, ფოთელებს მოუწევთ ძალიან მარტივი არჩევანის გაკეთება, პატიოსნებას, ღირსებას, ერთგულებას და რაც ჩამოვთვალე, იმას შორის. ასე რომ, კიდევ ერთხელ მინდა წარმატება ვუსურვო ჩვენს კანდიდატ. ასევე მინდა ვუთხრა ჩვენს ფოთელებს, მთავრობა ყველაფერს გააკეთებს იმისთვის, რომ ყველა ხარვეზი, თუ რაიმე ბოლო წლების განმავლობაში ფოთში იყო, მაქსიმალურად დროულად გამოსწორდეს“, – განაცხადა ღარიბაშვილმა.
მისი განცხადებით, 2 ოქტომბრის არჩევნებზე მაქსიმალური მობილიზებაა საჭირო.
„ჩვენ გვჭირდება მაქსიმალური მობილიზება იმისთვის, რომ კიდევ ერთხელ დამაჯერებლად, ღირსეულად გავიმარჯვოთ, გაიმარჯვოს ფოთმა და ფოთელებმა“, – განაცხადა ღარიბაშვილმა.
