ღარიბაშვილი – გასულ წელს ხელისუფლება ინტენსიურად მუშაობდა სუვერენიტეტის განმტკიცების, დეოკუპაციისა და რუსეთ-საქართველოს კონფლიქტის მშვიდობიანი მოგვარების მიმართულებით

გასულ წელს საქართველოს ხელისუფლება ინტენსიურად მუშაობდა ქვეყნის სუვერენიტეტის განმტკიცებისა და ტერიტორიული მთლიანობის უზრუნველყოფის, დეოკუპაციისა და რუსეთ-საქართველოს კონფლიქტის მშვიდობიანი გზით მოგვარების მიმართულებით, – ამის შესახებ აღნიშნულია პრემიერ-მინისტრის, ირაკლი ღარიბაშვილის წლიურ მოხსენებაში, რომელიც პარლამენტს წარედგინა.

დოკუმენტში აღნიშნულია, რომ გასულ წელს ჟენევის საერთაშორისო მოლაპარაკებების სამი რაუნდი ჩატარდა, სადაც მთავარ თემებს წარმოადგენდა რუსეთის ფედერაციის მიერ 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობა, ძალის არგამოყენების, უსაფრთხოების საერთაშორისო მექანიზმების შექმნისა და იძულებით გადაადგილებულ პირთა და ლტოლვილთა დაბრუნების საკითხები. ასევე, განიხილებოდა საქართველოს ოკუპირებულ ტერიტორიებზე უსაფრთხოების, ჰუმანიტარული და ადამიანის უფლებების, მათ შორის, ქართველების ეთნიკური დისკრიმინაციის კუთხით შექმნილი მძიმე ვითარება და კონკრეტული გამოსავლის მოძიების საჭიროება.

მთავრობის ცნობით, აქცენტი კეთდებოდა ასევე რუსეთისა და მისი საოკუპაციო რეჟიმების მხრიდან ინციდენტების პრევენციისა და მათზე რეაგირების მექანიზმების წინააღმდეგ მიმართულ დესტრუქციულ ქმედებებსა და ამ მნიშვნელოვანი მექანიზმის შეუფერხებელი მუშაობის აუცილებლობაზე.

„საქართველო ინტენსიურად მუშაობდა საერთაშორისო ასპარეზზე, როგორც ორმხრივ, ისე მრავალმხრივ ფორმატებში გამართული ვიზიტებისა და შეხვედრების ფარგლებში, პარტნიორების მხარდაჭერის მობილიზებისა და საერთაშორისო დღის წესრიგში თემის აქტიურად დაყენებისთვის რუსეთზე საერთაშორისო ზეწოლის უზრუნველყოფის მიზნით. მუდმივ რეჟიმში ხდებოდა პარტნიორი სახელმწიფოებისა და საერთაშორისო ორგანიზაციების ინფორმირება რუსეთის ოკუპაციის პოლიტიკის, უსაფრთხოების, ადამიანის უფლებებისა და ჰუმანიტარული კუთხით შექმნილი უმძიმესი მდგომარეობისა და ფაქტობრივი ანექსიისკენ გადადგმული ნაბიჯების შესახებ, რისი თვალსაჩინო მაგალითიცაა მიმდინარე წლის 17 ივლისს ცხინვალის რეგიონში/სამხრეთ ოსეთში დაგეგმილი ე. წ. რეფერენდუმი რუსეთის ფედერაციასთან მიერთების თაობაზე.

სწორედ ქართული მხარის აქტიური დიპლომატიური ნაბიჯების შედეგად, პარტნიორების მხრიდან დაფიქსირდა მკაფიო საჯარო მხარდაჭერა საქართველოს ტერიტორიულ მთლიანობასა და სუვერენიტეტთან დაკავშირებით. განსაკუთრებულ აღნიშვნას იმსახურებს საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის მანდატით ევროკავშირის წევრი ქვეყნების(ავსტრია, ლიეტუვა, რუმინეთი) საგარეო საქმეთა მინისტრების ვიზიტი საქართველოში სამხრეთ კავკასიის ტურნეს ფარგლებში. ამასთანავე, რუსეთის ფედერაციისა და მისი საოკუპაციო რეჟიმების მიერ განხორციელებული უკანონო ქმედებები ასახულ იქნა პარტნიორი ქვეყნებისა და საერთაშორისო ორგანიზაციების არაერთ დოკუმენტში“, – ნათქვამია მოხსენებაში.

პრემიერ-მინისტრი ირაკლი ღარიბაშვილი სამთავრობო პროგრამის შესრულების თაობაზე მოხსენებას პარლამენტს პირადად ივნისის ბოლომდე წარუდგენს.

წინა სტატიაშიირაკლი ღარიბაშვილმა პარლამენტს სამთავრობო პროგრამის შესრულების შესახებ მოხსენება წარუდგინა
შემდეგი სტატიაწულუკიანი – გაუგებარია, რომ პატიმარ სააკაშვილს „ევროპის სახალხო პარტია“ კვლავ მიიჩნევს დიდ დემოკრატად, ამ დროს ის არის ადამიანი, რომელიც არბევდა ჩვენს ხალხს, სცემდა, აწამებდა პატიმრებს ციხეებში