გარდაიცვალა დედაქალაქის ყოფილი მერი ნიკოლოზ (ნიკო) ლეკიშვილი. ნიკოლოზ ლეკიშვილი დაიბადა 1947 წელს.
ნიკოლოზ ლეკიშვილი სხვადასხვა წლებში სხვადასხვა მაღალ თანამდებობაზე მუშაობდა. მათ შორის 1993-1995 წლებში იყო რესპუბლიკის პრემიერ-მინისტრის მოადგილე, 1993-1995 წლებში – თბილისის მერი. ასევე, ნიკოლოზ ლეკიშვილი 1995-1998 წლებში იყო საქართველოს რესპუბლიკის სახელმწიფო მინისტრი, 1990-1991 წლებში – საქართველოს რესპუბლიკის უზენაესი საბჭოს წევრი, საარჩევნო ბლოკი „საქართველოს ერთიანი კომუნისტური პარტიიდან“.
მას ხელი აქვს მოწერილი საქართველოს სახელმწიფოებრივი დამოუკიდებლობის აღდგენის აქტზე (1991 წლის 9 აპრილი).
ამასთან, ნიკოლოზ ლეკიშვილი 1992-1995 წლებში იყო საქართველოს მე-3 მოწვევის პარლამენტის წევრი, 1999-2004 წლებში – საქართველოს მე-5 მოწვევის პარლამენტის წევრი, ხოლო 2004-2008 წლებში – საქართველოს მე-6 მოწვევის პარლამენტის წევრი.
ნიკოლოზ ლეკიშვილს 2019 წელს მიღებული აქვს თბილისის საპატიო მოქალაქის წოდება.
