თბილისში, ნაძალადევის რაიონში გარდაცვლილი ოთხი წლის ბავშვის დედის ადვოკატი ნინო ტაბატაძე აცხადებს, რომ მისი დაცვის ქვეშ მყოფს შემაკავებელი ორდერი არ დაურღვევია. ამასთან, აღნიშნა, რომ საქმეში დანაშაულის ნიშნები არ არსებობდა.
ნინო ტაბატაძის თქმით, სასამართლო პროცესზე, რომელიც დახურულ რეჟიმში მიმდინარეობდა, ბრალდების მხარე პატიმრობის შეფარდებას ითხოვდა.
„საქმეში არ არსებობდა დანაშაულის ნიშნები. დავაყენეთ შუამდგომლობა, ბრალდებულის აღკვეთის გარეშე დატოვება, თუმცა ალტერნატივად დავაყენეთ შუამდგომლობა, რომ შეთანხმება დაგვეყენებინა გაუსვლელობასა და სათანადო ქცევაზე, ანუ ხელწერილი რომ ჰქონოდა. რაც შეეხება ორდერს, არ დაურღვევია. ამაზე დეტალურად ვისაუბრეთ. ორდერში წერია, რომ ბრალდებული არ უნდა მიახლოებოდა დაზარალებულის საცხოვრებელს, თუმცა დაზარალებული განრიდებული უნდა ყოფილიყო, რაც არ განხორციელდა. ამის შემდეგ თუ მიუახლოვდებოდა და ექნებოდა კომუნიკაცია, ასეთ დროს ექნებოდა დარღვევას ადგილი. ქალბატონი არ უნდა წასულიყო სახლიდან. მსხვერპლი უნდა განერიდებინათ. მტკიცებულებები არის ის, თუ რა ვითარებაში მიიღო ბავშვმა დაზიანებები 6 იანვარს“, – განაცხადა ადვოკატმა.
ამასთან, როგორც პროკურორმა ლევან ჟორჟოლაძემ განაცხადა, სასამართლომ სწორი გადაწყვეტილება მიიღო.
„საფრთხეებისა და ფაქტობრივი გარემოებების გათვალისწინებით მიგვაჩნია, რომ სასამართლომ სწორი გადაწყვეტილება მიიღო. ორდერი არის გამოწერილი მოძალადის ქალის მიმართ. შემაკავებელი ორდერის გამოცემას ითვალისწინებს კანონი და იქ მითითებულია, რომ ბინის მესაკუთრესაც კი, თუ მას ორდერი აქვს, ის უნდა გავიდეს ბინიდან. თავდაპირველად არასრულწლოვნის გაყვანაც მოხდა.
პროკურორის თქმით, მიმდინარეობს გამოძიება სხვა დეტალების დასადგენად და აღნიშნა, რომ ყველა ვერსიას განიხილავენ.
გარდაცვლილი ოთხი წლის ბავშვის დედას აღკვეთის ღონისძიების სახით პატიმრობა დღეს შეეფარდა. ლეილა ქსოვრელს შემაკავებელი ორდერით გათვალისწინებული ვალდებულებების შეუსრულებლობა ედება ბრალად.
