სიკვდილიანობა, როგორც წესი, 2-3 კვირით ჩამორჩება ხოლმე ყოველდღიური ინფიცირების რაოდენობის ზრდას. თუ 2 კვირის წინ 4000-5000 შემთხვევა გვქონდა, ის სიკვდილიანობის ზრდას გარკვეული პერიოდის შემდეგ მოგვცემდა, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ, საკოორდინაციო საბჭოს დასრულების შემდეგ განაცხადა.
როგორც მან ასევე აღნიშნა, ამ მოვლენაზე ბევრი სხვა ფაქტორიც მოქმედებს. გარდა ამისა, გამყრელიძემ ანტიმიკრობულ რეზისტენტობაზეც ისაუბრა.
„ერთ-ერთი ყველაზე დიდი გამოწვევა ახლად წარმოშობილ ვირუსულ დაავადებებთან ერთად არის ანტიმიკრობული რეზისტენტობა, როდესაც ანტიბიოტიკები ვეღარ მოქმედებენ ჩვეულებრივად იმ შტამებზე, რომლებიც გავრცელებულია. ეს გლობალური პრობლემაა. ამან განსაკუთრებით თავი იჩინა ასეთი მასობრივი ინფიცირების დროს, როგორიც გახლავთ კოვიდი, რომლითაც ორ წელიწადში 280 მილიონი ადამიანი დაინფიცირდა და 5,4 მილიონი, სამწუხაროდ, გარდაიცვალა“, – განაცხადა გამყრელიძემ.
