პროკურატურის ინფორმაციით, ქართველი ემიგრანტების Facebook-გვერდზე უნებართვო შეღწევისა და თანხების თაღლითურად დაუფლებისთვის 6 პირს ბრალი წარუდგინეს.
უწყების განცხადებაში ნათქვამია, რომ ბრალდებულებმა უცხოეთში სამუშაოდ მყოფი საქართველოს შვიდი
მოქალაქის Facebook-გვერდზე უნებართვოდ შეაღწიეს. დანაშაულებრივი ჯგუფის წევრები მათი სახელით დაუკავშირდნენ, როგორც საზღვარგარეთ სამუშაოდ მყოფ, ასევე საქართველოში მცხოვრებ მათსავე მეგობრებს, რომლებსაც ონლაინ-კაზინოსა და სწრაფი გზავნილის ანგარიშზე სხვადასხვა ოდენობის თანხა მოტყუებით ჩაარიცხინეს. ბრალდებულები, თაღლითური გზით 14 დაზარალებულის კუთვნილ 10 500 ლარს დაეუფლნენ.
სამართალდამცველებმა 5 პირი 20 ივლისს დააკავეს. მათ ბრალად ედებათ ორგანიზებული ჯგუფის მიერ ჩადენილ თაღლითობა, რამაც მნიშვნელოვანი ზიანი გამოიწვია და წინასწარი შეთანხმებით ჯგუფის მიერ კომპიუტერულ სისტემაში უნებართვო შეღწევა. დანაშაული 7-10 წლამდე თავისუფლების აღკვეთას ითვალისწინებს.
პროკურატურამ ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს მიმართა.
რაც შეეხება 6 ბრალდებულიდან ერთ-ერთს, პროკურატურის ინფორმაციით, ის სხვა დანაშაულის ჩადენის ფაქტზეა დაკავებული და აღკვეთის სახით პატიმრობა აქვს შეფარდებული.
