ხობის მუნიციპალიტეტში, აკაკი შანიძის ქუჩაზე, რკინიგზის სადგურიდან რამდენიმე მეტრში, მჭიდრო დასახლების შუაგულში, ბეტონის ქარხანას აშენებენ. მიუხედავად მოსახლეობის პროტესტისა, სამშენებლო სამუშაოები უკვე რამდენიმე კვირაა მიმდინარეობს.
„თაიმერს“ შანიძის ქუჩის მცხოვრებლები დაუკავშირდნენ და დახმარება ითხოვეს, მათვე მოგვაწოდეს ფოტომასალა ადგილიდან, სადაც სამშენებლო სამუშაოები მიმდინარეობს.
„ეს ტერიტორია, სადაც ახლა ცემენტის გადამამუშავებელი ქარხანა შენდება, ბონდო ჩიტაიას ეკუთვნოდა, რომელმაც თავის დროზე სახელმწიფოსგან შეიძინა. იქ, ადრე წარმოების ძველი შენობა იდგა, მოგვიანებით ბონდომ შენობა დაშალა და მიწა გაყიდა. ახლა, როცა მშენებლობა იწყებოდა და შევიტყვეთ, რომ ჩვენი საცხოვრებელი სახლიდან 5-10 მეტრის დაშორებით ცემენტის გადამუშავება მოხდებოდა, მოსახლეობამ პროტესტი გამოვთქვით, რადგან ჩვენი და ჩვენი შვილების ჯანმრთელობას მათი საქმიანობა პირდაპირ საფრთხეს შეუქმნის. ვიკითხეთ, ვინ იდგა ამ ყველაფრის უკან და ადგილზე გ. ქ. მოვიდა, რომელიც ამჟამად პატიმრობაში იმყოფება. მან თქვა, რომ ყველაფერი კანონის ფარგლებში მიმდინარეობს და მშენებლობის ნებართვა ადგილობრივმა მერიამ გასცა.
მეზობლებმა გ. ქ-ს ვუთხარით რომ არ გაეკეთებინა ეს დასახლებულ პუნქტში, რკინიგზის სადგურიც იქვეა, თან ბეტონის ქარხნისთვის ეს მიწა არასაკმარისია. ჩვენ კი ვეწინააღმდეგებით, მაგრამ ვერაფერს გავხდით. ხალხს ეშინია, რადგან ის კაცი მარტივად წყვეტს ადამიანის მოკვლას, ყველასთვის ცნობილია რისთვისაც იხდის ახლა სასჯელს. როცა ვუთხარით, რომ ამ ტერიტორიაზე არ შეიძლებოდა ბეტონის წარმოება, გვიპასუხა, რომ მისი საქმე მან უკეთ იცის და უკანონოდ არაფერს აკეთებს. ერთხელ გვქონდა მცდელობა, რომ საქმეში ჟურნალისტები ჩაგვერთო, როცა გაიგეს, რომ ტელევიზიიდან აპირებდნენ მოსვლას, ტერიტორია სასწრაფოდ მოასუფთავეს, ვიფიქრეთ, რომ მშენებლობას შეწყვეტდნენ, მაშინ ძირითადი სამუშაოები დაწყებული არც იყო. თურმე, მერიაში უთქვამთ ჟურნალისტებისთვის, რომ „კერძო ტერიტორიაა და სახლი შენდება“-ო, რის შემდეგაც ჟურნალისტებმა ადგილზე მოსვლა გადაიფიქრეს. ახლა კი, გვინდა თქვენი მედიასაშუალებით ხმა მივაწვდინოთ შესაბამის ორგანოებს, რომ ამ უკანონობას ბოლო მოეღოს“, – ამბობს „თაიმერთან“ ერთ-ერთი ადგილობრივი.
მათი პროტესტის ძირითადი მიზანი გარემოს დაბინძურების შედეგად, ჯანმრთელობის პრობლემების ხელოვნურად წარმოქმნა და მუდმივ მტვერსა და ხმაურში ცხოვრებაა, რის თავიდან ასაცილებლადაც მოქალაქეებმა ჯერ ხობის მუნიციპალიტეტის მერიას, თითოეული ადგილობრივის ხელმოწერით დადასტურებული შესაბამისი განცხადებით მიმართეს, მას შემდეგ კი, როცა უწყებამ ბიზნესმენს მშენებლობის გაგრძელების ნება მაინც დართო, ადგილობრივები მედიის საშუალებით ცდილობენ პრობლემასთან გამკლავებას.
„მსგავსი ქმედება დაუშვებელია, ასეთი დაწესებულება მოსახლეობისგან მინიმუმ 5 კილომეტრით მაინც ხომ უნდა იყოს დაშორებული?! რაღაც დაფა გააკრეს, რომელიც იმდენად მაღლაა დამონტაჟებული ადამიანი ვერც წაიკითხავს. ამბობენ, რომ ვიღაც სენაკელი კაცია დამკვეთი და გ. ქ. უბრალოდ აშენებს. არ ვიცი ეს რამდენად სწორი ინფორმაციაა, მაგრამ დამკვეთს უთქვამს, რომ მოსახლეობასთან და მერიასთან მას უნდა „მოეგვარებინა”.
რაც შეეხება ადგილობრივ მერიას, შესაბამის სამსახურს მშენებლობის ნებართვა უკვე გაცემული აქვს. რამდენიმე მეზობელი შევკრიბე და მივედით მერიაში, სადაც გვითხრეს, რომ ყველაფერი კანონის ფარგლებში ხორციელდება და ისინი ამის წინააღმდეგნი არ არიან, რადგანაც „ადამიანები, რომლებიც აღნიშნულ პროექტზე მუშაობენ, არაკანონიერს არაფერს აკეთებენ, მტვერმა და ხმაურმა თუ შეგაწუხათ მერე გარემოს დაცვას მიმართეთ, ეს ქარხანა კი, იქ, აუცილებლად უნდა აშენდეს, რა არის აქ სანერვიულო“-ო. ჩვენ ვიცით რომ ეს პროექტი დამახინჯებულია და სპეციალისტებმა არ იციან?! გუშინ ვიმყოფებოდით მერიაში შეხვედრაზე, სადაც წავიყვანეთ ადამიანი, რომელიც ერკვეოდა ამ საქმეში და როცა არგუმენტირებულად ვუთხარით რატომ იყო დაუშვებელი იმ ტერიტორიაზე მოსახლეობის თვალწინ ამ წარმოების მშენებლობა, პასუხი ვერ გაგვცეს. ჩვენ მერიაში დაახლოებით ერთი კვირის წინ განცხადებაც შევიტანეთ, რომელსაც ყველა მოსახლე ვაწერთ ხელს. საბოლოო ჯამში, უკვე მივხვდით, რომ შეკრულები არიან და მერია ვერაფერში დაგვეხმარება, პირიქით, ისინი ხელს უწყობენ ამ წარმოების ჩვენი სახლების მახლობლად აშენებას“, – ამბობენ შანიძის ქუჩის მცხოვრებლები.
როგორც ისინი „თაიმერთან“ საუბრისას აღნიშნავენ, მსგავსი ობიექტის მშენებლობა, არც მოსახლეობასთან შეუთანხმებიათ და არც წესები დაუცავს ვინმეს, სამშენებლო სამუშაოების მიმდინარეობა კი, ღია სივრცეში ხდება, ღობის გარეშე.
მათივე თქმით, მას შემდეგ, რაც გუშინ აკაკი შანიძის ქუჩის მოსახლეობა ხობის მუნიციპალიტეტის მერიაში, აღნიშნულ საკითხთან დაკავშირებით შეხვედრაზე იმყოფებოდა, ადგილზე, სადაც, ბეტონის ქარხნის მშენებლობის ძირითადი სამუშაოები უკვე შესრულებულია, გარემოს დაცვის სამსახურის თანამშრომლები მივიდნენ და ტერიტორია დაათვალიერეს, რომლებმაც მოსახლეობას არაოფიციალურად განუცხადეს, რომ გარემო-ფაქტორებიდან გამომდინარე, ასეთ მჭიდრო დასახლებაში ადგილობრივ მერიას ბეტონის ქარხნის მშენებლობის ნებართვა არ უნდა გაეცა.
ბერდია კალანდია
