“ევროპული საქართველო” მეორე ტურისთვის თითოეულ საარჩევნო უბანზე დამკვირვებლებს ამატებს

“ევროპული საქართველო” მეორე ტურისთვის თითოეულ საარჩევნო უბანზე დამკვირვებლებს ამატებს და მობილურ ჯგუფებს ქმნის, რომლებიც თითოეულ საარჩევნო უბანზე იმოძრავებენ. ამის შესახებ ინფორმაციას „ევროპული საქართველო“ ავრცელებს.

მათივე ინფორმაციით, “ევროპული საქართველოს” ლიდერები ზუგდიდში ადგილობრივ გუნდს შეხვდნენ. შეხვედრაზე მათ 30 ოქტომბერს დანიშნული მეორე ტურის წინასაარჩევნო სტრატეგია განიხილეს.

„ეს არჩევნები არ არის მხოლოდ იმ კანდიდატის მხარდაჭერა, რომელიც მეორე ტურშია, ზუგდიდის შემთხვევაში, მერობის კანდიდატის ანზორ მელიას, არამედ, ეს არის ჩვენი ქვეყნის მომავლისთვის უდიდესი საფრთხის მატარებლის „ივანიშვილის რეჟიმის“ მორყევის შესაძლებლობა, რომ ჩვენ მივაღწიოთ ვადამდელ არჩევნებს და შევაჩეროთ ეს კატასტროფული კურსი, რაც ამ რეჟიმს აქვს აღებული ჩვენი ქვეყნისთვის. ამისთვის საჭიროა ყველა ამომრჩევლის მოტივირება და საჭიროა, რომ ჩვენი გუნდის ყველა აქტიური წევრი იყოს საარჩევნო უბნებზე არჩევნების მიმდინარეობისას“, – განაცხადა „ევროპული საქართველოს“ თავმჯდომარემ, გიგა ბოკერიამ.

„ევროპული საქართველოს“ ზუგდიდის ორგანიზაციის თავმჯდომარის, ბართლომე შელიას განცხადებით, საპროტესტო ელექტორატის მაქსიმალურად მობილიზებისთვის ყველაფერი გაკეთდება.

„კიდევ ერთხელ გავიარეთ „ევროპული საქართველოს“ ზუგდიდის ორგანიზაციის სტრატეგია მეორე ტურისთვის. ჩვენ მზად ვართ იმისთვის, რომ ყველგან აბსოლუტურად, სადაც ჩვენი წარმომადგენლები არიან, კომისიებში, წარმომადგენლების სახით ტერიტორიულ ერთეულებში, ყველაფერი გავაკეთოთ საპროტესტო ელექტორატის მაქსიმალურად მობილიზებისთვის და საბოლოოდ გავაფორმოთ ოპოზიციის გამარჯვება ზუგდიდში“, – განაცხადა შელიამ.

წინა სტატიაშიმდინარაძე – მოვუწოდებ ყველას, ვისთვისაც მნიშვნელოვანია ბრძოლით მოპოვებული თავისუფლების დაცვა, შემოგვიერთდით საარჩევნო კამპანიის დასკვნით ღონისძიებაზე
შემდეგი სტატიაჩიხლაძე – დღეს ჩვენ ვიხილავთ დაშინებულ საჯარო მოხელეებს აქციაზე