ევროპის ფრენების უსაფრთხოების სააგენტო (EASA) მგზავრებს რუსეთის გარკვეული რეგიონების თავზე ფრენის საშიშროების შესახებ აფრთხილებს. ორგანიზაციის ინფორმაციაში აღნიშნულია, რომ არ არსებობს სამოქალაქო და სამხედრო უწყებებს შორის სათანადო კოორდინაცია.
EASA-ს ცნობით, ეს გადაწყვეტილება მიღებულია უსაფრთხოების მაქსიმალური უზრუნველყოფისთვის რუსეთსა და უკრაინას შორის მიმდინარე ომის პირობებში.
გაფრთხილებაში მოსკოვის და სანკტ-პეტერბურგის საჰაერო სივრცეც შედის. განცხადებაში აღნიშნულია, რომ სამოქალაქო თვითმფრინავები შეიძლება უნებლიე სამიზნე გახდეს, რადგანაც სამოქალაქო და სამხედრო სტრუქტურებს შორის სათანადო კოორდინაცია არ არსებობს და „თვითმფრინავის იდენტიფიცირება შეიძლება შეცდომით მოხდეს“.
EASA-ს დასკვნაში აღნიშნულია, რომ მსგავსი ინციდენტი გასული წლის 25 დეკემბერს გროზნოსთან მოხდა, სადაც „აზერბაიჯანული ავიახაზების“ თვითმფრინავს რაკეტა მოხვდა და ამ კატასტროფის შედეგად ბორტზე მყოფი 67 ადამიანიდან 38 დაიღუპა.
