ევროპის კოსმოსურმა სააგენტომ (ESA) საფრანგეთის გვიანაში მდებარე კურუს კოსმოდრომზე რუსული რაკეტების „სოიუზ-სტ“-ს სასტარტო კომპლექსი ააფეთქა. 52-მეტრიანი მობილური მომსახურების კოშკი დემონტაჟის შედეგად განადგურდა.
კადრები Roscosmos-ის პრესსამსახურის ყოფილმა ხელმძღვანელმა, დიმიტრი სტრუგოვეცმა გამოაქვეყნა. კოშკის აფეთქებამდე, ოთხი საყრდენი მოჭრეს და საკაბელო ანძები დაშალეს.
დარჩენილი ინფრასტრუქტურა — ასაწყობი და სატესტო ობიექტი, რკინიგზა, თხევადი ჟანგბადის შესანახი ობიექტები და საწვავის შევსების სადგურები — ახალი რაკეტის გასაშვებად გადაეცემა ფრანგული Arianespace-ის შვილობილ კომპანია Maiaspace-ს. ისინი ამ ბაზას გამოიყენებენ ახალი რაკეტის გასაშვებად, რომლის პირველი სტარტიც 2027 წელს იგეგმება.
ESA-სა და „როსკოსმოსის“ 15-წლიანი თანამშრომლობა, რომელიც კომერციული აპარატების ორბიტაზე გაყვანას გულისხმობდა, რუსეთის უკრაინაში შეჭრის გამო შეწყდა. აშშ-მა და ევროკავშირმა რუსეთის კოსმოსური ინდუსტრიის წინააღმდეგ სანქციები დააწესეს, Roscosmos-მა კი გაშვების შეჩერების შესახებ განაცხადა და რუსი სპეციალისტები გაიწვია.
