ევროკავშირს გაზის საცავების შევსების ტემპის დაჩქარება სურს. ენერგეტიკულ ბაზარზე არსებული მძიმე ვითარების ფონზე, კანონმდებლები ფიქრობენ, რომ სტრატეგიული რეზერვების კრიტიკულ დონეზე შემცირება რეგიონისთვის უდიდესი პრობლემა იქნება, ამიტომ ქვეყნებმა მარაგების შევსება უნდა დაიწყონ, მიუხედავად 100%-ით გაძვირებული ბუნებრივი აირისა.
2026 წლის მარტის ბოლო მონაცემებით, ევროკავშირის გაზის საცავებში მარაგების დონე საშუალოდ 29%-ს შეადგენს. მიუხედავად იმისა, რომ ეს მაჩვენებელი კრიტიკულ ნიშნულს ჯერ არ უახლოვდება, ის მაინც ჩამორჩება გასული წლის ანალოგიური პერიოდის მონაცემებს. თანაც, ქვეყნებს შორის ამ მხრივ მკვეთრი განსხვავება შეინიშნება.
პოლონეთი, სადაც საცავების შევსების დონე 85%-ს აღწევს, ენერგეტიკული დამოუკიდებლობის თვალსაზრისით ლიდერის პოზიციას ინარჩუნებს. ამის საპირისპიროდ, გერმანიასა და საფრანგეთში მარაგები 22%-ის ფარგლებში მერყეობს, ხოლო ნიდერლანდებში მაჩვენებელი საგანგაშო 7%-მდე დავიდა. ევროკომისია შიშობს, რომ მარაგების შევსების მიმართულებით დაყოვნება ბაზარზე ფასების კიდევ უფრო მეტ არასტაბილურობას შექმნის.
აღსანიშნავია, რომ გეოპოლიტიკური ვითარების გათვალისწინებით, ევროკავშირმა საცავების შევსების სავალდებულო ნიშნული 90%-დან 80%-მდე შეამცირა. თავად ეს გადაწყვეტილება წევრი ქვეყნებისთვის ფინანსური წნეხის შემსუბუქებას ემსახურება, რათა მათ გაზის შესყიდვა უკიდურესად მაღალი ფასების პირობებში არ მოუწიოთ.
ექსპერტები ვარაუდობენ, რომ მომავალი თვეების განმავლობაში ევროპული ქვეყნების ეკონომიკური სტაბილურობა სწორედ საცავების შევსების ეფექტურობაზე იქნება დამოკიდებული. თუ ქვეყნები ერთიან შესყიდვებსა და რესურსების გადანაწილებაზე შეთანხმებას ვერ მოახერხებენ, სამომხმარებლო ტარიფების ზრდა გარდაუვალი გახდება.
