ევროკავშირის სადამკვირვებლო მისია სოფელ კოდასთან სროლის ფაქტს არ ადასტურებს. EUMM-ის განცხადებით, მისიის დამკვირვებლები სოფლის მიმდებარე ტერიტორიაზე 5 ნოემბერს, 24 საათის განმავლობაში პატრულირებდნენ. შედეგად, სროლის ფაქტი არც ერთ დამკვირვებელს დაუდასტურებია.
„ადგილობრივების და საქართველოს ხელისუფლების წარმომადგენლების ინფორმაციაზე დაყრდნობით, ტერიტორიაზე სროლის ფაქტი არ დასტურდება“, – აღნიშნულია ევროკავშირის მონიტორინგის მისიის განცხადებაში.
6 ნოემბერს დეფაქტო სახელმწიფო უსაფრთხოების კომიტეტი აცხადებდა, რომ ხაშურის მუნიციპალიტეტის სოფელ კოდადან, სადაც საქართველოს პოლიციის საგუშაგოა განთავსებული, მათი მიმართულებით ავტომატური იარაღიდან 10-15-ჯერ გაისროლეს. სუს-ში ეს ინფორმაცია მორიგ პროვოკაციად შეაფასეს.