ევროპის წამლების სააგენტომ (EMA) დღეს, სამშაბათს განაცხადა, რომ კოვიდ-19-ის საწინააღმდეგო ვაქცინა Johnson&Johnson-ის პრეპარატ Janssen-სა და თრომბოზების იშვიათ შემთხვევებს შორის შესაძლო კავშირი იპოვა, მაგრამ აღნიშნა, რომ პრეპარატის სიკეთე მისი მიღების რისკს აღემატება.
“ევროპის წამლების სააგენტოს უსაფრთხოების კომიტეტმა (PRAC) დაადგინა, რომ ვაქცინა Janssen-ის აღწერაში დასამატებელია გაფრთხილება უჩვეულო თრომბოზებზე, თრმბოციტების დაბალი რაოდენობით” – განცხადებაშია ნათქვამი. “სამედიცინო მუშაკებმა და ხალხმა, ვინც ამ ვაქცინას გაიკეთებს, უნდა იცოდნენ შესაძლო ძალიან იშვიათი შემთხვევების შესახებ ვაქცინაციიდან სამი კვირის განმავლობაში” – წერს ევროპის წამლების სააგენტო. აღნიშნულია, ასევე, რომ სააგენტომ მის ხელთ არსებული მტკიცებულებები შეისწავლა, რომლის დროსაც რვა შემთხვევაში უჩვეულო თრომბოზი განვითარდა, ერთი შემთხვევა კი ლეტალურად დასრულდა. 7 აპრილის მონაცემებით 7 მილიონზე მეტმა ამერიკელმა მიიღო აღნიშნული ვაქცინა. სანამ ამერიკული და ევროპული რეგულატორები საკითხს სწავლობდნენ, ფირმამ ვაქცინის ევროპაში გავრცელება შეწყვიტა.
ჯერეჯრობით უცნობია, ევროპის წამლების რეგულატორის განცხადების შემდეგ რომელი ქვეყნები დაიწყებენ “ჯონსონ ენდ ჯონსონის” ვაქცინის გამოყენებას. საფრანგეთმა უკვე განაცხადა, რომ მას 55 წლის ზევით მოქალაქეებს შესთავაზებს.
