„ეს წერილი გახლავთ ამერიკის მიმართ შანტაჟი, მე თუ დავსანქცირდები, მოვაღებ პირს და ვიტყვი, რომ თქვენი ელჩი მაიძულებდა, ომი დამეწყო რუსეთისათვის“ – შალვა ნათელაშვილი ივანიშვილის განცხადებაზე

„ლეიბორისტული პარტიის“ ლიდერი შალვა ნათელაშვილი ბიძინა ივანიშვილის განცხადებას გამოეხმაურა და მას საუკუნის ტყუილი უწოდა. ნათელაშვილის თქმით, აღნიშნული განცხადება ამერიკის მიმართ შანტაჟია.

„ეს წერილი გახლავთ ამერიკის მიმართ მორიგი შანტაჟი, აი, მე თუ დავსანქცირდები საბოლოოდ, მაშინ მოვაღებ პირს და ვიტყვი, რომ თქვენი ელჩი თქვენი დავალებით მაიძულებდა, ომი დამეწყო რუსეთისათვის, თითქოს ორ დღეში აიღებდა მოსკოვს. აი, საუკუნის ტყუილი“, – განაცხადა ნათელაშვილმა.

ცნობისთვის, 27 ივლისს ყოფილმა პრემიერ-მინისტრმა და „ქართული ოცნების“ ყოფილმა თავმჯდომარემ ბიძინა ივანიშვილმა განცხადება გაავრცელა, სადაც ადასტურებს, რომ აშშ-ის ელჩს კელი დეგნანს ნამდვილად შეხვდა.

როგორც ივანიშვილი განცხადებაში აღნიშნავს, მმართველმა გუნდმა სწორად იმუშავა, სწორი და პრინციპული პოზიცია დაიკავა და მთავარი სირთულე, ომის საფრთხის პირველი ეტაპი უკვე გადალახა.

მისივე თქმით, ამ ძალისხმევის წყალობით, საქართველოს ომში ჩათრევის უშუალო საფრთხე დღეს მაქსიმალურად არის განეიტრალებული.

როგორც ივანიშვილი განცხადებაში აღნიშნავს, გარკვეული ძალები საქართველოს ომში ჩათრევას აქტიურად ცდილობდნენ და ეს საკითხი დღესაც აქტუალურია.

წინა სტატიაშიდიმიტრი ხუნდაძე – ბიძინა ივანიშვილის წერილმა პრაქტიკულად ყველაფერს ფარდა ახადა
შემდეგი სტატიაგოგა ხაინდრავა: მიჰყევით კიკუს გაუფრთხილდით ვირუსებს და ვენერიულ დაავადებებს!