საქართველოს ეროვნული ბანკი აშშ-ის სახაზინო დეპარტამენტის მიერ საქართველოში დაფუძნებული კრიპტოკომპანიის დასანქცირების ფაქტს ეხმაურება და განმარტავს, რომ აღნიშნულ სუბიექტს სებ-ისთვის რეგისტრაციის თაობაზე არ მიუმართავს.
„ხაზგასმით აღვნიშნავთ, რომ აშშ-ის სახაზინო დეპარტამენტის უცხოური აქტივების კონტროლის ოფისის (OFAC) მიერ სანქცირებულ სუბიექტს — შპს «შელბითს» (SHELBIT) — ვირტუალური აქტივის მომსახურების პროვაიდერად რეგისტრაციის თაობაზე საქართველოს ეროვნული ბანკისთვის არ მოუმართავს. შესაბამისად, ის არ წარმოადგენს სებ-ის მიერ რეგულირებულ სუბიექტს. ამასთან, სამეწარმეო რეესტრის მონაცემების თანახმად, აღნიშნულ კომპანიას გაუქმებული აქვს რეგისტრაცია“, — აღნიშნულია ეროვნული ბანკის განცხადებაში.
მარეგულირებელი ორგანოს განმარტებით, სებ-ის ჩარჩო აწესებს მკაცრ მოთხოვნებს, რაც უკანონო საქმიანობასთან დაკავშირებული სუბიექტებისთვის მნიშვნელოვან ფილტრს წარმოადგენს. უწყებაში ასევე აღნიშნავენ, რომ ვირტუალური აქტივის სერვისის პროვაიდერების მარეგულირებელი ჩარჩო სრულად შეესაბამება FATF-ის სტანდარტებს, რაც ევროპის საბჭოს ექსპერტთა კომიტეტის (Moneyval) შეფასებითაც დასტურდება.
აშშ-ის სახაზინო დეპარტამენტმა საქართველოში დაფუძნებული კრიპტოკომპანია 8 აგვისტოს დაასანქცირა. ამერიკული მხარის ცნობით, გამოაშკარავდა კრიპტოვალუტის ფარული ქსელი, რომელსაც ირანის „ისლამური რევოლუციის გუშაგთა კორპუსი“ საერთაშორისო სანქციებისთვის გვერდის ავლით იყენებდა.
