ექსკლუზივი : ანა დოლიძის შემცვლელად ტექნიკურმა უნივერსიტეტმა ჯემალ გახოკიძე წარადგინა

admin
ავტ.: admin ივლისი 13, 2020 13:28

ექსკლუზივი : ანა დოლიძის შემცვლელად ტექნიკურმა უნივერსიტეტმა ჯემალ გახოკიძე წარადგინა

იუსტიციის უმაღლეს საბჭოში ანა დოლიძის შემცვლელად საქართველოს ტექნიკურმა უნივერსიტეტმა ჯემალ გახოკიძე წარადგინა. გადაწყვეტილება ამის შესახებ უნივერსიტეტის აკადემიურმა საბჭომ 30 ივნისს მიიღო და შესაბამისი ბრძანება N01-05-04/94 ოფიციალურ ვებგვერდზე გამოაქვეყნა.
შევარდნაძის ეპოქის ყოფილი უშიშროების მინისტრი ტექნიკურ უნივერსიტეტში იურიდიულ ფაკულტეტზე მუშაობს და სხვადასხვა პროექტებს ახორციელებს, რამდენად წარმატებულს სხვა საკითხია, ფაქტია, რომ ყველა მსხვილი პროექტის „დირიჟორი“ პროფესორი გახოკიძეა და მას უნივერსიტეტი თითქმის ყველა საპარლამენტო არჩევნებში მხარს უჭერდა. მიუხედავად საქართველოს ერთ-ერთი მსხვილი უნივერსიტეტის თანადგომისა, გახოკიძემ არჩევნებში ხმების 0.1%-ი ძლივს დააგროვა.
ტექნიკურმა უნივერსიტეტმა ჯემალ გახოკიძე 2018 წელს მთავარი პროკურორის პოსტზეც წარადგინა, თუმცა, მოგვიანებით, 2020 წელს, იმ ფაკულტეტმა სადაც გახოკიძე მოღვაწეობს ირაკლი შოთაძეს დაუჭირა მხარი და აკადემიურ საბჭოს შესაბამისი გადაწყვეტილება საპროკურორო საბჭოში წარდგინების ბოლო დღეს შევიდა. უნივერსიტეტმა იმჟამად განაცხადა, რომ შოთაძეს ფაკულტეტმა მაღალპროფესიონალიზმის გამო დაუჭირა მხარი.
გასულ წელს, მედიაგამოცემებში გავრცელდა ინფორმაცია, რომ ჯემალ გახოკიძეს მთავრობა აფხაზეთის დე-ფაქტო ხელისუფლებასთან ურთიერთობის დარეგულირების თემებზე სამუშაოდ იწვევდა. 2018 წლის ნოემბერში ერთ-ერთმა გამოცემამ საინტერესო სტატია გამოაქვეყნდა, რომელიც წყაროს მითითებით „თაიმერმა“ გაიზიარა. გთავაზობთ მასალას არქივიდან:
„კულუარულად გავრცელებული ინფორმაციით, საქართველოს მთავრობა აფხაზეთის დე-ფაქტო მთავრობასთან ურთიერთობების დასარეგულირებლად ნაბიჯის გადადგმას იწყებს და ამ საკითხის მოგვარებას, არც მეტი, არც ნაკლები, შევარდნაძის ეპოქის უშიშროების ყოფილ მინისტრს, ჯემალ გახოკიძეს ანდობს.
ჯემალ გახოკიძე, რომელიც შევარდნაძის ეპოქაში, სხვადასხვა დროს იყო ეროვნული უშიშროების საბჭოს მდივნის მოადგილე, უშიშროების მინისტრი, შსს-ის გამომძიებელი, დეპარტამენტის თავმჯდომარის მოადგილე, მინისტრის მოადგილე, მთავრობის აზრით, თურმე შესძლებს და აფხაზეთის დე-ფაქტო მთავრობასთან პრობლემებს მოაგვარებს.
ეს ის გახოკიძეა, რომელიც იმ დროს იყო მინისტრის მოადგილე, როცა სამინისტროს მეექვსე თუ მეშვიდე სართულიდან დაკავებულები ხტებოდნენ, რადგან ვერ უძლებდნენ წამებას და ამას ის „გაგებით ეკიდებოდა“; გახოკიძე, რომელსაც ბალუაშვილთან ერთად, როგორც იმჟამინდელი პრესა წერდა და პატიმრები სასამართლო პროცესებზე აცხადებდნენ, ლომის წილი მიუძღვის ზვიადისტების დაკავებისა და წამების საქმეში, თუნდაც იმით, რომ იცოდა ამ ყველაფრის შესახებ და არაფერს აკეთებდა, სდუმდა; გახოკიძე, რომლის ხელმძღვანელობით გამოძიებულმა ტერაქტისა თუ ქუჩაში ადამიანების დახვრეტის საქმეებმა სასამართლოში სრული ფიასკო განიცადა და რომელსაც ზვიად გამსახურდიას მომხრეები, ბალუაშვილთან ერთად, ქვეყნის მტრად აცხადებდნენ, საინტერესოა, რა ენაზე და რა თემაზე უნდა დაელაპარაკოს აფხაზეთის ე.წ. მთავრობას.
ერთადერთი, რაც გახოკიძეს აფხაზეთთან დადებით ასპექტში აკავშირებს, მის მიერ გამოცემული წიგნია – „ჰონკონგი-ჩინეთი“, რომელიც, გავრცელებული ინფორმაციით, დამუშავდა „კონფლიქტების დარეგულირების სამართლებრივი, პოლიტიკური და ეკონომიკური კვლევების ცენტრში“. უშიშროების ყოფილმა მინისტრმა პარალელები გაავლო ქართულ-აფხაზურ კონფლიქტსა და ჰონკონგ-ჩინეთს შორის – ეს არის და ეს. სხვა შემხებლობა იმ დროს, როცა აფხაზეთსა და დანარჩენ საქართველოს შორის ურთიერთობებზე მხოლოდ ტყვია ლაპარაკობდა, გახოკიძე კი ქვეყანაში სტრატეგიულ პერსონას წარმოადგენდა, მას არ ჰქონია. ის სდუმდა.
საინტერესო გახოკიძის ბიოგრაფიაში ასევე არის ის, რომ „ქართული ოცნების“ ხელისუფლებაში მოსვლის შემდეგ, ყველამ უცებ დაივიწყა საყოველთაოდ ცნობილი ფაქტი, თავის დროზე როგორ უხდიდა სააკაშვილის ბებიას, მზია წერეთელს დაბადების დღეებს, როგორ გადაუხადა დაბადების დღე ურეკში გივი ალასანიას, და უცებ, თბილისის მერის, დავით ნარმანიას მრჩევლად მოგვევლინა. ცოტა ხნის წინ, მიუხედავად იმისა ხონელი არაა, ხონის საპატიო მოქალაქეც გახდა. ამიტომ იყო, ალბათ, რომ „ქართული ოცნების“ ხელისუფლებაში მოსვლის შემდეგ გახოკიძემ თავისი კანდიდატურა წარადგინა მთ.პროკურორის პოზიციაზე, სურდა გამხდარიყო უზენაესი სასამართლოს თავმჯდომარე, კენჭს იყრიდა დეპუტატობაზე, თუმცა მხოლოდ ოჯახის წევრების ხმები დააგროვა. და, მაინც, ის არ დანებდა და ახლა აფხაზეთის საკითხებს გადასწვდა. მთავრობა კი, რომელის მომხრეებიც ყველას კგბ-ს აგენტებს ეძახიან, სწორედ კგბ-ს ნომეკლატურას ანდობს ისეთი მტკივნეული თემის მოგვარებას, რომელსაც აფხაზეთი ქვია“.

admin
ავტ.: admin ივლისი 13, 2020 13:28