ეკა ბესელია : დავალიანების განულების ინიციატივა ყველაზე მასშტაბური სოლიდარობის აქტია და არ გულისხმობს სახელმწიფო ან ადმინისტრაციული რესურსის გამოყენებას

600 ათასზე მეტი მოქალაქისთვის დავალიანების განულების ინიციატივა ყველაზე მასშტაბური სოლიდარობის აქტია, – ამის შესახებ პარლამენტის იურიდიულ საკითხთა კომიტეტის ხელმძღვანელმა, ეკა ბესელიამ განაცხადა.

მისი თქმით, 600 000-ზე მეტი მოქალაქე ჩაერთვება ეკონომიკურ აქტივობაში, რაც ძალიან მნიშვნელოვანია.

„გუშინდელი უპრეცედენტო გადაწყვეტილება მართლაც ყველაზე მასშტაბური სოლიდარობის აქტია, რომლითაც 600 000 ჩვენს მოქალაქეს, მათ შორის 150 000-ზე მეტი სოციალურად დაუცველია და არის ათასობით შშმ-პირი, გაუნულდებათ დავალიანება, რაც აქვთ 2000 ლარის ფარგლებში აღებული და ამ ვალდებულებას დაფარავს „ქართუ“. უპრეცედენტო სოლიდარობის აქციით და ამ გადაწყვეტილებით ისინი დაბრუნდებიან ბიზნესში, ეკონომიკაში, ჩაერთვებიან საერთო ეკონომიკურ ბაზაში. ეს არის უმნიშვნელოვანესი ბიძგი და მხარდაჭერა, როგორც ეკონომიკური თვალსაზრისით, ასევე თითოეული ამ მოქალაქის სოციალური მხარდაჭერისთვის“, – განაცხადა ეკა ბესელიამ.

რაც შეეხება კითხვას ამომრჩეველთა შესაძლო მოსყიდვაზე, ეკა ბესელია განმარტავს, რომ აღნიშნული ინიციატივა არ გულისხმობს სახელმწიფო რესურსების გამოყენებას, არამედ ვალდებულებას თავის თავზე იღებს ფონდი „ქართუ“.

„რაც შეეხება ამ საკითხის სამართლებრივ მხარეს, საარჩევნო კოდექსი კრძალავს ისეთი ტიპის მოქმედებებს, რომელიც ამომრჩევლის მოსყიდვას ემსახურება კანდიდატის წარმომადგენლის მეშვეობით ან ადმინისტრაციული, სახელმწიფო რესურსების გამოყენებით. აქ საუბარია არა სახელმწიფო ან ადმინისტრაციული რესურსების გამოყენებაზე, არამედ იმაზე, რომ კერძო საქველმოქმედი ორგანიზაცია „ქართუ“ ფონდი და ბიძინა ივანიშვილი, მას ნამდვილად ეკუთვნის მადლიერება ამ გადაწყვეტილების გამო, იღებს თავის თავზე ამ ვალდებულებას. ეს არის მართლაც უდიდესი სიკეთე. ამიტომ, ეს უნდა გავმიჯნოთ იმ ტიპის სამართლებრივი ქმედებებისგან, როგორიც მაგალითად „ნაციონალურმა მოძრაობამ“ ვაუჩერების სახით განახორციელა, სადაც არის პირდაპირ ნიშნები ამომრჩევლის მოსყიდვის“, – განაცხადა ბესელიამ.

რაც შეეხება ჟურნალისტების კითხვას, რომ ბიძინა ივანიშვილი არის პარტია „ქართული ოცნების“ თავმჯდომარე და იკვეთება თუ არა მოსყიდვის ნიშნები, დეპუტატი განმარტავს, რომ ბიძინა ივანიშვილი არის მმართველი პარტიის თავმჯდომარე, მაგრამ სახსრები, რომლითაც ინიციატივა განხორციელდება, არ არის არც სახელმწიფო და არც ადმინისტრაციული რესურსი.

banner
წინა სტატიაში“ეს ნამდვილად გარკვეულ ეჭვებს ბადებს“ – ლიეტუვას საგარეო საქმეთა მინისტრი არჩევნების სამუშაო დღეს დანიშვნაზე საუბრობს
შემდეგი სტატია„ქართული ოცნება“ არის ჩვეულებრივი მატყუარა ადამიანების ერთობლიობა” – გიორგი ვაშაძე ვალების ჩამოწერის შესახებ მთავრობის ინიციატივას ეხმაურება