უკრაინული უპილოტო საფრენი აპარატების ინტენსიური თავდასხმების შედეგად, რუსეთში საწვავის დეფიციტია. ქვეყნის რეგიონების უმეტესობაში ავტოგასამართი სადგურები საწვავის ლიმიტირებულ გაცემაზე გადავიდნენ, რადგან კრიზისმა უკვე თითქმის მთელი სახელმწიფო მოიცვა.
მიწოდების პრობლემები თავდაპირველად ანექსირებულ ყირიმში დაიწყო, სადაც ჯერ კიდევ 21 ივნისს საგანგებო მდგომარეობა გამოცხადდა და მოსახლეობისთვის საწვავის მიყიდვა სრულად აიკრძალა. ამ ეტაპზე კრიზისი რუსეთის 50-ზე მეტ ოფიციალურად აღიარებულ რეგიონში დასტურდება.
CNN-ის ინფორმაციით, რუსეთში ბენზინის წარმოების მოცულობა შიდა მოთხოვნასთან შედარებით 20%-ით შემცირდა. გადამუშავების მაჩვენებლები მრავალწლიან მინიმუმზეა.
ექსპერტების შეფასებით, მიმდინარე კრიზისი გასული წლის აგვისტოს დეფიციტთან შედარებით ბევრად მძიმეა, რაც უკრაინული იერიშების სიხშირისა და დრონების რაოდენობის ზრდით არის განპირობებული.
შექმნილი მდგომარეობიდან გამოსასვლელად რუსეთის ხელისუფლება რამდენიმე ალტერნატიულ გზას განიხილავს:
ნავთობგადამამუშავებელი ქარხნების გეგმური რემონტის ვადების შემცირება;
დიზელის ექსპორტის აკრძალვა და საწვავის იმპორტის გაზრდა.
Reuters-ის ინფორმაციით, რუსეთმა ბენზინის შესყიდვა ინდოეთიდან უკვე დაიწყო.
გარდა ამისა, კრემლი შიდა ბაზარზე დაბალი ხარისხის საწვავის დაშვებასაც განიხილავს, რაც სპეციალისტების განმარტებით, ახალი ავტომობილების ძრავების დაზიანების რისკებს საგრძნობლად ზრდის.
