აშშ-ის პრეზიდენტის, დონალდ ტრამპის განცხადებით, რუსეთის ტერიტორიის სიღრმეში უკრაინის მიერ ბოლო დროს განხორციელებული დარტყმები ომის ესკალაციას წარმოადგენს, თუმცა ამავდროულად, შესაძლოა შექმნას პირობები კონფლიქტის დასასრულებლად. ტრამპმა ეს განცხადება NATO-ს სამიტის კულუარებში, უკრაინის პრეზიდენტ ვოლოდიმირ ზელენსკისთან ერთობლივი შეხვედრისას გააკეთა.
პრეზიდენტის პოზიციას ემთხვევა აშშ-ის სახელმწიფო მდივნის, მარკო რუბიოს შეფასებაც. რუბიოს განმარტებით, უკრაინის გაზრდილმა შესაძლებლობამ, იერიში მიიტანოს რუსეთის სიღრმეში არსებულ სამიზნეებზე, ბოლო თვეებში ომის დინამიკა შეცვალა, რის გამოც რუსეთს საკუთარი საჰაერო სივრცის დაცვა სულ უფრო უჭირს. სახელმწიფო მდივანი იმედოვნებს, რომ ეს ფაქტორი ომის დასასრულებლად მოლაპარაკებების სივრცეს შექმნის.
ამასთანავე, დონალდ ტრამპმა გამოაცხადა, რომ შეერთებული შტატები უკრაინას „პატრიოტის“ (Patriot) ტიპის საზენიტო-სარაკეტო სისტემების ლიცენზირებული წარმოების უფლებას მისცემს, რაც ვაშინგტონის მხრიდან სამხედრო მხარდაჭერის გაგრძელებაზე მიანიშნებს.
