დომაგო იურიევიჩი: ქართული მობილური ბაზრის კვლევა ევროკავშირის საუკეთესო პრაქტიკაზე დაყრდნობით ჩავატარეთ და აღმოვაჩინეთ, რომ ის არაკონკურენტულია და რეგულაციას საჭიროებს

„ჩვენ დავასკვენით, რომ ქართული მობილური მომსახურებების ბაზარი განიცდის კონკურენციის ნაკლებობას, ამის მიზეზი კი ბაზარზე დომინანტი კომპანიის არსებობაა, რომელსაც საფუძვლიანი კვლევის მიხედვით, „მაგთიკომი“ წარმოადგენს. ბაზრის ანალიზის შედეგად შემუშავებული ვალდებულებები, რომელიც ComCom-მა „მაგთიკომს“ უნდა დააკისროს, მოხსნიან ბაზარზე შესვლის ბარიერებს და ხელს შეუწყობენ ახალი მოთამაშეების შემოსვლას.“ – აღნიშნული განცხადება კომუნიკაციების კომისიის დაკვეთით განხორციელებული მობილური მომსახურებების ბაზრის კომპლექსურ კვლევაში მონაწილე ევროკავშირის ექსპერტმა და ექსპერტთა ჯგუფის ხელმძღვანელმა, დომაგო იურიევიჩმა ComCom-ის მიერ გამართული კვლევის პრეზენტაციის ფარგლებში გააკეთა.

დომაგო იურიევიჩის განცხადების მიხედვით, ქართული მობილური კომუნიკაციების ბაზრის კვლევა ექსპერტებმა ევროკავშირის საუკეთესო პრაქტიკაზე დაყრდნობით განახორციელეს. მისივე თქმით, კვლევით დადგინდა ისიც, რომ არაკონკურენტული გარემო ბაზრის გაუმართაობაზე მიანიშნებს, რომლის ძირითად ინდიკატორებსაც ინოვაციური ტექნოლოგიების სიმწირე, ოპერატორთა მაღალი მომგებიანობის მაჩვენებელი (EBITDA მარჟა) და შემოსავლების მზარდი ტენდენცია წარმოადგენს. ექსპერტმა აღნიშნა ისიც, რომ ქართულ ბაზარზე ოპერირებს მხოლოდ ერთი მობილური ვირტუალური ქსელის ოპერატორი (MVNO), მაშინ, როდესაც ევროპის ქვეყნების ბაზარზე არაერთი მსგავსი კომპანია არსებობს, რაც, ამ უკანასკნელზე დაბალ ბარიერებსა და შესაბამისად – ნაკლებ რეგულაციებს განაპირობებს.

შეხვედრის ფარგლებში, ექსპერტმა ქართული ბაზრის კონკურენციის პრობლემების აღმოფხვრასა და გადაჭრის გზებზეც გაამახვილა ყურადღება, რაც, მისი თქმით, „მაგთიკომისთვის“ დაშვების ვალდებულებების დაკისრებას გულისხმობს, რომლის ფარგლებშიც, მნიშვნელოვანი ძალის მქონე ოპერატორმა საკუთარ ინფრასტრუქტურაზე დაშვების მსურველ კომპანიებს წვდომა უნდა მისცეს: „კვლევის მიხედვით, აღნიშნულმა დაშვების მსურველმა ოპერატორებმა, შესაბამისი საფასურის გადახდის შემდგომ, უნდა შეძლონ „მაგთიკომის“ ინფრასტრუქტურაზე დაშვება და ქსელის გამოყენება. ამგვარად, ეს მნიშვნელოვანი ძალის მქონე ოპერატორისთვის დამატებითი შემოსავლის წყარო გახდება და ამასთან, გამოიწვევს ბაზარზე კონკურენციის გაუმჯობესებას, რაც, თავის მხრივ, მომხმარებლისთვის მიწოდებული მომსახურების ხარისხს გააუმჯობესებს და ფასებს შეამცირებს“ – აღნიშნა ევროკავშირის ექსპერტმა.

banner
წინა სტატიაშიმიხეილ სარჯველაძე – ონკოლოგიის დაფინანსებაზე 2012 წლის განმავლობაში დანახარჯი შეადგენდა სულ 13 მილიონს ლარს, 2024 წელს დაგეგმილი ხარჯის ოდენობა შეადგენს 229 მილიონ ლარს
შემდეგი სტატიარუსულ კანონს არცერთი ნიშნით არ ჰგავს, განსხვავებაა როგორც ცა და დედამიწა – ვოლსკი