დიუშენით დაავადებული ბავშვების მშობლები მთავრობის ადმინისტრაციასთან აქციას მართავენ.
პოლიციამ მათ მთავრობის ადმინისტრაციასთან სკვერში პუფების შეტანის უფლება არ მისცა.
„არც აქციის ჩატარებას გიშლით, არც ღამის გათენებას, ნივთებს, კონსტრუქციებს ვერ შეგატანინებთ“, – უთხრა მათ პოლიციის მაღალჩინოსანმა გოგა მემანიშვილმა.
„პუფი წერილში არ ეწერა“… „სკამებზე დავწვეთ?!“ – უთხრეს მას მშობლებმა.
ისინი პუფებში სკვერის გარეთ დასხდნენ. ამბობენ, რომ ღამით ადგილზე დარჩებიან.
მთავრობის ადმინისტრაციასთან დიუშენით დაავადებული ბავშვების მშობლებმა 24-საათიანი საპროტესტო აქცია დაიწყეს.
დიუშენით დაავადებული ბავშვების მშობლები მოითხოვენ, სახელმწიფომ შეიძინოს და დააფინანსოს თანამედროვე მედიკამენტები, რომლებიც სხვა ქვეყნებში უკვე გამოიყენება და ბავშვების მდგომარეობის გაუარესებას ანელებს.
მშობლები ასევე 2 თვეზე მეტია, უშედეგოდ ცდილობენ ირაკლი კობახიძესთან შეხვედრას.
