დავითაშვილი – აქართველოს მოქალაქეები ჩინეთში უვიზოდ გამგზავრებას რამდენიმე დღეში შეძლებენ

საქართველოს მთავრობის სხდომის შემდეგ ეკონომიკის მინისტრმა, ვიცე-პრემიერმა ლევან დავითაშვილმა განაცხადა, რომ საქართველოს მოქალაქეებისთვის ჩინეთში უვიზო მიმოსვლის რეჟიმი რამდენიმე დღეში ამოქმედდება.

„ეს არ არის თვეების ამბავი, ეს არის დღეების საკითხი, როდესაც ძალაში შევა – 30 დღე უწყვეტად, ერთი შესვლის განმავლობაში. იგივე რეჟიმი ჩვენ გვაქვს ჩინეთის მოქალაქეებისთვის”, – განმარტა დავითაშვილმა.

ვიცე-პრემიერი ამბობს, რომ ჩინეთის ხელისუფლების გადაწყვეტილება მნიშვნელოვანია სავაჭრო-ეკონომიკური თვალსაზრისით.

„შარშანვე იყო ამაზე საუბარი, რომ საქართველოს მოქალაქეებისთვისაც 2024 წლიდან ყოფილიყო უვიზო მიმოსვლის შესაძლებლობა ჩინეთში. ასეც მოხდა. ეს გადაწყვეტილება მალე შევა ძალაში. მიმდინარეობს ტექნიკური სამუშაოები, შესაბამისად ჩვენს მოქალაქეებს მიეცემათ საშუალება, ყოველგვარი ბარიერის გარეშე იმოგზაურონ ჩინეთში. ბუნებრივია, ეს ჩვენს ქვეყნებს შორის კავშირებს ნამდვილად შეუწყობს ხელს.

პირველ რიგში, ეს იქნება სავაჭრო-ეკონომიკური კუთხით ძალიან მნიშვნელოვანი. იცით, რომ ჩინეთი მნიშვნელოვანი სავაჭრო-ეკონომიკური პარტნიორია საქართველოსი. ჩვენი ქვეყნის ძალიან ბევრი მოქალაქე ეკონომიკური ურთიერთობებისთვის ჩინეთში მიემგზავრებოდა, მაგრამ ეს არ იყო ასეთი მარტივი. ვფიქრობთ, რომ უვიზო მიმოსვლა ამას ხელს შეუწყობს, გაამარტივებს და საქართველოდანაც მეტი ვიზიტორი იქნება ჩინეთში”, – თქვა მან.

ეკონომიკის მინისტრის შეფასებით, საქართველოს მოქალაქეებისთვის ჩინეთში უვიზო მიმოსვლის შემოღება პირდაპირი ავიარეისების გაზრდის შესაძლებლობას იძლევა.

„ეს ასევე კავშირშია ავიამიმოსვლის კიდევ უფრო წახალისებასთან. ჩვენ სულ ვსაუბრობდით ჩინეთის სხვადასხვა ავიაკომპანიასთან იმაზე, რომ მეტი პირდაპირი ფრენა იყოს ჩინეთის სხვადასხვა ქალაქთან. მხოლოდ ამ გზით ჩვენ შეგვიძლია რეალური, მნიშვნელოვანი რაოდენობის გენერირება ტურიზმის სექტორში და მნიშვნელოვანი წვლილი სწორედ ამან შეიძლება გამოიწვიოს. აქედან გამომდინარე, ეს [უვიზო მიმოსვლა] ამ კუთხითაც წამახალისებელი იქნება, – აღნიშნა დავითაშვილმა და დაამატა, – საერთოდ, ვფიქრობ, რომ ეს დინამიკა, რომელიც ჩინეთთან გვაქვს, ხელახლა დაიწყო ეკონომიკური ურთიერთობების გააქტიურება გასულ წელს, მიმდინარე წელს კიდევ უფრო გააქტიურდება და შემდგომ წლებში პრაქტიკულ ეკონომიკურ შედეგებსაც მოგვიტანს”.

26 თებერვალს პრემიერ-მინისტრმა ირაკლი კობახიძემ განაცხადა, რომ ჩინეთმა საქართველოს მოქალაქეებისთვის უვიზო რეჟიმი დააწესა. მისი თქმით, ისინი ჩინეთში 30 დღის განმავლობაში შეძლებენ უვიზოდ ყოფნას. კობახიძემ ახალ გადაწყვეტილებას უწოდა საქართველოსა და ჩინეთს შორის გაფორმებული სტრატეგიული პარტნიორობის შეთანხმების მნიშვნელოვანი, პრაქტიკული სიახლე.

საქართველომ ჩინეთის მოქალაქეებისთვის უვიზო მიმოსვლა 2023 წლის 11 სექტემბერს შემოიღო.
2023 წლის 31 ივლისს საქართველომ და ჩინეთმა გამოაქვეყნეს ერთობლივი განცხადება ორ ქვეყანას შორის სტრატეგიული პარტნიორობის დამყარების შესახებ.

banner
წინა სტატიაშიპოლიტიკური თანამდებობის პირებს ნარკოლოგიური შემოწმების გავლის ვალდებულება აღარ ექნებათ
შემდეგი სტატია„Macroeconomic Outlook and 5 key themes for 2024“ – თიბისი კაპიტალმა პუბლიკაცია ახლა უკვე საერთაშორისო აუდიტორიას და პარტნიორებს წარუდგინა