საქართველოს საგარეო საქმეთა მინისტრმა, დავით ზალკალიანმა ვაშინგტონში ვიზიტის ფარგლებში შეხვედრა გამართა რელიგიის თავისუფლების საკითხებში ამერიკის შეერთებული შტატების საგანგებო დავალებათა ელჩთან, სამუელ ბრაუნბეკთან.
საქართველოს საგარეო საქმეთა სამინისტროს ინფორმაციით, შეხვედრაზე ელჩმა დადებითი შეფასება მისცა და მადლობა გადაუხადა ქართულ მხარეს მინისტერიალში მონაწილეობისთვის, რომელიც მსოფლიოში რელიგიის თავისუფლების საკითხებს შეეხება. შეხვედრაზე ხაზი გაესვა რელიგიის თავისუფლებისა და შემწყნარებლობის საკითხებში საქართველოს მდიდარ ისტორიულ გამოცდილებას.
„საგანგებო დავალებათა ელჩთან შეხვედრაზე განსაკუთრებული ყურადღება გამახვილდა საქართველოს ოკუპირებულ რეგიონებში ადამიანის უფლებების დაცვის მხრივ არსებულ რთულ ვითარებაზე, მათ შორის რელიგიის თავისუფლების შეზღუდვისა და ისტორიული რელიგიური ძეგლების დაზიანებისა და ხელყოფის ფაქტებზე. მხარეები მიესალმნენ რელიგიის თავისუფლების საკითხებში აშშ-ის სახელმწიფო დეპარტამენტის ყოველწლიურ ანგარიშს, სადაც საუბარია საქართველოს ოკუპირებულ რეგიონებში შექმნილ მდგომარეობაზე, რაც წარმოადგენს კარგ მექანიზმს იმისათვის, რომ საერთაშორისო თანამეგობრობის ყურადღება მიპყრობილი იქნას მოცემულ საკითხზე“, – აცხადებენ საქართველოს საგარეო უწყებაში.
საქართველოს საგარეო საქმეთა მინისტრი ვაშინგტონს 17-19 ივლისს სტუმრობს. დავით ზალკალიანი სახელმწიფო მდივნის მიწვევით მონაწილეობს რელიგიის თავისუფლების საკითხებთან დაკავშირებულ მინისტერიალში.
