დავით საგანელიძე ჩინეთში საქმიან შეხვედრებს მართავს

საპარლამენტო უმრავლესობის ლიდერი დავით საგანელიძე უმრავლესობაში რაიმე სახის დაპირისპირებას გამორიცხავს და ამის შესახებ გავრცელებულ ხმებს ოპონენტებისა და გარკვეული ორგანიზაციების სურვილად მოიხსენიებს.

საპარტნიორო ფონდის აღმასრულებელი დირექტორი დავით საგანელიძე ჩინეთში საქმიან შეხვედრებს მართავს. როგორც “თაიმერს” საპარტნიორო ფონდიდან აცნობეს, დავით საგანელიძე, ვიზიტის ფარგლებში საქართველოს დელეგაციას ხელმძღვანელობს. მათივე ინფორმაციით, ძილინის პროვინციის დედაქალაქ ჩანჩუნში გამართულ ბიზნეს კონფერენციაზე საქართველოს დელეგაციის წარმომადგენლებმა და ადგილობრივმა ბიზნესმენებმა ეკონომიკური და კულტურული ორმხრივი ურთიერთობების პოტენციალი განიხილეს, განისაზღვრა მომავალი თანამშრომლობის სფეროები.
ფონდის ინფორმაციით, განსაკუთრებული ყურადღება დაეთმო ძილინის პროვინციასთან დამეგობრებული რაჭა-ლეჩხუმის და ქვემო სვანეთის რეგიონის განვითარების შესაძლებლობებს.
“კონფერენციაზე რეგიონის ეკონომიკური პოტენციალის პრეზენტაცია მოაწყო რაჭა-ლეჩხუმის და ქვემო სვანეთის გუბერნატორმა პარმენ მარგველიძემ, რომელიც ვიზიტის ფარგლებში ქართულ დელეგაციას წარმოადგენს. კონფერენციის მეორე ნაწილი დაეთმო საპარტნიორო ფონდის საქმიანობას. დავით საგანელიძემ შესაძლო პარტნიორობაზე ისაუბრა და განაცხადა, რომ ფონდი მზად არის აქტიურად ითანამშრომლოს ჩინელ ინვესტორებთან საქართველოში ბიზნეს პროექტების განხორციელებისთვის”, – აცხადებენ საპარტნიორო ფონდში.
მათივე ინფორმაციით, საქართველოს დელეგაციის წევრებმა შეხვედრები გამართეს ასევე პროვინციის პირველ მდივანთან ბა ინჩაოლუსთან, პროვინციის გუბერნატორ ძიანგ ჩაო ლიანგთან და სახალხო კრების ვიცე სპიკერ ხუანგ ლი ხუასთან.
მათი განცხადებით, საქართველო ჩინეთისთვის სტრატეგიულად მნიშვნელოვანი პარტნიორია და მათი ქვეყანა მიესალმება საქართველოს აქტიურობას “ახალი აბრეშუმის გზის ეკონომიკური სარტყელის” პროექტში. ჩინეთი გამოთქვამს მზადყოფნას, ითანამშრომლოს საქართველოსთან არა მხოლოდ რეგიონალურ, არამედ მსოფლიო მასშტაბის პროექტებში. ბა ინჩაოლუს განცხადებით, საქართველო-ჩინეთს მრავალსაუკუნოვანი ურთიერთობა აკავშირებთ, თუმცა ისტორიის მანძილზე ყველაზე აქტიურ თანამშრომლობას სწორედ ბოლო პერიოდის განმავლობაში მიაღწიეს.
დავით საგანელიძემ იმედი გამოთქვა, რომ საქართველო გახდება ჩინეთისა და ევროპის დამაკავშირებელი ხიდი და ჩინეთის მხარდაჭერით შეძლებს დაანახოს მსოფლიო საზოგადოებას, რომ შესაძლებელია პატარა და დიდი ქვეყნის თანამშრომლობითა და ურთიერთმხარდაჭერით საერთო სარგებლის მიღება.
საპარტნიორო ფონდის ინფორმაციით, შეხვედრაზე მხარეებმა კონკრეტულ პროექტებზე ისაუბრეს, მაშ შორის, ქართული ღვინის იმპორტსა და ქუთაისის საავტომობილო ქარხნის საფუძველზე ძილინის უდიდესი საავტომობილო ქარხნის ფილიალის გახსნის ან ერთობლივი წარმოების განხორციელების პერსპექტივაზე. თავის მხრივ, დავით საგანელიძემ კიდევ ერთხელ ხაზგასმით აღნიშნა საპარტნიორო ფონდის მზადყოფნა, დაეხმაროს ინვესტორებს თავისუფლად მოქმედებასა და მიმართულებების განსაზღვრაში.
საქართველოს დელეგაციის წევრები შეხვედრებს გამართავენ ასევე ჩინეთის საერთაშორისო კომერციულ ბანკთან, აბრეშუმის გზის ფონდთან, აზიის ინფრასტრუქტურისა და საინვესტიციო ბანკთან, ჩინეთის ექსპორტ იმპორტის ბანკსა და ჩინეთის განვითარების ბანკთან.
ჩინეთის სახალხო რესპუბლიკაში კოალიცია “ქართული ოცნების” დელეგაცია, დავით საგანელიძის ხელმძღვანელობით ჩინეთის მმართველი პარტიის მიწვევით იმყოფება.

banner
წინა სტატიაში“ალეკო ელისაშვილმა დაასახელოს თუნდაც ერთი გვარი, ვინც ანგარებით მოხვდა სიაში”
შემდეგი სტატიადავით ნარმანია კორექტირებულ ბიუჯტთან დკავშირებით ინფორმაციას საზოგადოებას ხვალ მიაწვდის