ვარკეთილის მეტროში ჭერის ჩამონგრევის ფაქტთან დაკავშირებით კომენტარს აკეთებს, დედაქალაქის ყოფილი მერი დავით ნარმანია.
სწორედ ნარმანიას მერობის პერიოდში გაიმარჯვა გამოცხადებულ ტენდერში კომპანია შპს „ყვარელმშენმა“ და მისივე მერობის პერიოდში ჩაიბარა თბილისის მერიამ დასრულებული და რეაბილიტირებული პროექტები.
ნარმანია მომხდარს სამწუხაროს უწოდებს და დროული გამოძიების აუცილებლობაზე საუბრობს. თბილისის ყოფილი მერი ამბობს, რომ აუცილებელია მკაცრად დაისაჯოს ყველა ის პირი, რომლის შეცდომის გამოც დღევანდელი უბედური შემთხვევა მოხდა.
“შემთხვევა არის ძალიან სამწუხარო, რასაც არანაირი გამართლება არ აქვს. მნიშვნელოვანია ის, რომ გაირკვეს გამოძიებით რასთან გვქონდა საქმე. მე რაც ნამდვილად მახსოვს, პროექტი არსებობდა ნამდვილად, საპროექტო დოკუმენტაცია, რომელზე დაყრდნობითაც გამოცხადდა ტენდერი. ტენდერში გამარჯვებულმა კომპანიამ შეასრულა სამუშაოები. ასევე რაიმე სახის დაჩქარებასთან ან დროულად გაკეთებასთან დაკავშირებით ჩვენი მხრიდან კომპანიასთან მითითებები არ ყოფილა. კომპანიას ჰქონდა საკმარისი დრო და რესურსი იმისათვის, რომ გაეკეთებინა სამუშაოები ხარისხიანად. ალბათ ძალიან ბევრი კითხვაზე უნდა გაგვცეს გამოძიებამ პასუხი და შესაბამისად დაისაჯონ ძალიან მკაცრად ის პირები, რომელთა ბრალეულობას გამოიკვეთება გამოძიების პროცესში,“-განაცხადა დავით ნარმანიამ.
კითხვაზე ვისი პასუხისმგებლობა დგას ჩატარებული სამუშაოების ჩაბარების კუთხით, თბილისის ყოფილი მერი ამბობს, რომ დეტალების შესახებ ინფორმაციას ფლობს სატრანსპორტო კომპანია, რომელიც სატენდერო საკითხებსაც და ობიექტთან დაკავშირებულ საკითხებს სწორედ სატრანსპორტო კომპანია უწევდა.
„დეტალებზე უნდა ვკითხოთ სატრანსპორტო კომპანიას, იმიტომ, რომ საკუთრივ სატენდერო კომისიაც და შესაბამისად ობიექტთან დაკავშირებულ საკითხებს ზედამხედველობას უწევდა თბილისის სატრანსპორტო კომპანია. შესაბამისად მეტი დეტალური ინფორმაციას კომპანია მოგაწვდით. მე ერთხელ ვიმყოფებოდი ობიექტზე, ისევე როგორც ამ კომპანიის მიერ შესრულებულ წინა ობიექტზე ახმეტელის მეტროსადგურში. ჩვენ ამ მეტროსადგურების რეაბილიტაცია დავიწყეთ იმიტომ, რომ იქ იყო ძალიან კრიტიკული მდგომარეობა,“-აცხადებს დავით ნარმანია.
