აშშ-ში საქართველოს ელჩს ნამდვილად ვეთანხმები, რომ ხელისუფლებაში პრორუსული ძალები არიან, ვინაიდან ხელისუფლებაშიც, საპარლამენტო უმრავლესობაშიც არიან პოლიტიკოსები, რომლებიც პირდაპირ მოგვიწოდებენ, სტალინის სურათები დავკიდოთ ოთახებში, რომ ნატო ცუდია და საქართველოს მომავალი ნატო-ში არ არის, – განაცხადა „ნაციონალური მოძრაობის“ ლიდერმა დავით ბაქრაძემ არჩილ გეგეშიძის განცხადების კომენტირებისას.
მისი თქმით, ხელისუფლებაში არის ძალიან ძლიერი პრორუსული ელემენტი.
„რაც შეეხება კონკრეტულად ელჩის განცხადებას და მის მომავალს, ვერ გეტყვით, ეს უნდა გადაწყვიტოს სამინისტრომ. ზოგადად, იმ არეულობის, არაკორდინირებულობის და ქაოტურობის პირობებში, რაც „ქართული ოცნების“ ხელისუფლებას ახასიათებს, არ გამიკვირდება არც ასეთი განცხადებები და არც ის ქმედება, რომელიც ამ განცხადებებს მოჰყვება. ამიტომ ელჩის კონკრეტული დისციპლინური პოლიტიკური პასუხისმგებლობა, ეს არის ხელისფულების და სამინისტროს გადასაწყვეტი“,- განაცხადა დავით ბაქრაძემ.
არჩილ გეგეშიძემ რამდენიმე ხნის წინ გააკეთა განცხადება, რომ პრორუსული პოლიტიკოსების არსებობა მმართველ გუნდში ქვეყანაში არსებულ პლურალისტურ გარემოზე მიუთითებს.