დავით ბაქრაძე-კონკრეტულმა ადამიანებმა უახლოესი ერთი თვის ვადაში საპატიმრო უნდა დატოვონ

„ევროპული საქართველოს“ წევრის დავით ბაქრაძის განცხადებით, კონკრეტულმა ადამიანებმა, რომლებთან დაკავშირებითაც დიპლომატების მონაწილეობით მმართველ პარტიისა და ოპოზიციის შეხვედრაზე იყო საუბარი, უახლოესი ერთი თვის ვადაში საპატიმრო უნდა დატოვონ.

ბაქრაძე განმარტავს, რომ შეთანხმება შედგება ორი ნაწილისგან, რაც ეხება საარჩევნო სისტემასა და პოლიტიკური კლიმატის ნორმალიზებას/პატიმრების გათავისუფლებას.

„ახლო მომავალში, უახლოესი ერთი თვის ვადაში კონკრეტულმა ადამიანებმა, ვიზეც იყო საუბარი ამ შეხვედრებზე, უნდა დატოვონ საპატიმრო. უნდა გვესმოდეს, რომ ამ შეთანხმებას აქვს ორი კომპონენტი და ის, რომ ხელი მოეწერა ორ დოკუმენტს, ძალიან კარგად ასახავს შეთანხმების არსს. შეთანხმების ერთი ნაწილი არის საარჩევნო რიცხვები და სისტემა, მეორე ნაწილი არის პოლიტიკური კლიმატის ნორმალიზება და პატიმრების გათავისუფლება.

რომელიმე ნაწილის არ შესრულება ნიშნავს მთლიანად შეთანხმების არ შესრულებას. უგულავაზე – ეს უკვე ტექნიკური საკითხია, რომელიც მოგვარებადია. არსებობს პრეცედენტები, როდესაც ოჯახის წევრი ან ადვოკატი მიმართავს პრეზიდენტს, როდესაც ასეთი რეზონანსული და პოლიტიკური საქმეა, ეს შეიძლება იყოს პოლიტიკური პარტიების მიმართვა. იმ განცხადებაში, რომელსაც „ქართული ოცნება“ ხელს აწერს, ნახსენებია პრეზიდენტი და მისი კონსტიტუციური უფლებები. ეს გაკეთებულია სწორედ იმიტომ, რომ პრეზიდენტმა გამოიყენოს მისი კონსტიტუციური უფლება და განმუხტოს კრიზისი უგულავას შეწყალების გზით“ ,- განაცხადა დავით ბაქრაძემ.