„ფაქტი ის არის, რომ დაფიქრდნენ, ჩაფიქრდნენ და ასე თქვათ, ფუსფუსებენ. ჩვენიდან რაც არის დასანახი, ეს არის, რომ ჯიქურ აღარ მოდიან,“ – ეს განცხადება ვანისა და ბაღდადის მიტროპოლიტმა, მეუფე ანტონმა, კანაფის კულტივაცია/ექსპორტის კანოპროექტის განხილვის შეჩერებასთან დაკავშირებით გააკეთა.
შაბათის კურიერთან ინტერვიუში მეუფე ანტონმა აღნიშნა, რომ კანონპროექტის განხილვის შეჩერება არის თუ არა შიშის შედეგი, არ იცის.
„შეშინების რა გითხრათ, ბევრმა მათგანმა იცის, რომ ამის შემდეგ ის იქნება უბრალო მოქალაქე და მას შვილიშვილიც ეყოლება, შვილიც ეყოლება და როდესაც სკოლაში მივლენ და მიიყვანენ შვილიშვილს და შვილს, რაღაც თითით საჩვენებელი იქნება, როგორც ერის ისტორიაში ცუდი მონაწილე და მე მგონია, სინდისი ყველა ადამიანში არის და ეს სინდისი მუშაობს და ძალიან ათეისტი, ძალიან თავზე ხელაღებული უნდა იყო ან ძალიან დავალებული იყო რაღაციდან, რომ ეს გააკეთო,“ – განაცხადა მეუფე ანტონმა.
