რუსეთის თავდაცვის სამინისტრომ 15 ათასამდე ნეპალის მოქალაქე დაიქირავა უკრაინის წინააღმდეგ ომში მონაწილეობის მისაღებად,-იუწყება CNN-ი
სხვა საკითხებთან ერთად, ამერიკულ ტელეარხს მოჰყავს ქვეყნის საგარეო საქმეთა ყოფილი მინისტრის ბიმალა რაი პაუდიალის განცხადება, რომელიც ამტკიცებს, რომ ამჟამად რუსეთის მხარეს ფრონტის ხაზზე 14-დან 15 ათასამდე ნეპალელი იბრძვის.
CNN-ის ცნობით, ნეპალის მოქალაქეები, რომლებსაც სურთ რუსეთის ჯარში გაწევრიანება, ქვეყანაში ტურისტული ვიზით შედიან და რუსეთის მთავრობა მათ ყოველთვიურ ხელფასს ორი ათასი დოლარის ოდენობით და რუსეთის მოქალაქეობის დაჩქარებულ რეგისტრაციას სთავაზობს.
ნეპალის ხელისუფლებამ ოფიციალურად განაცხადა, რომ რუსეთის მხარეზე ქვეყნის 200-მდე მოქალაქე იბრძვის, მათგან სულ მცირე 13 ფრონტზე დაიღუპა. ამასთან, ვრცელდება ინფორმაცია, რომ 100-მდე ადამიანი უგზო-უკვლოდ დაკარგულად ითვლება, კიდევ ოთხი უკრაინის ტყვეობაში იმყოფება.
მედიაზონამ გადაამოწმა CNN-ის მონაცემები FSB სასაზღვრო სამსახურის მონაცემების გამოყენებით. ისინი ადასტურებენ ნეპალიდან რუსეთში შემოსული ტურისტების რაოდენობის მკვეთრ ზრდას, მაგრამ არა ისე, როგორც CNN-ის წყაროები ამბობენ.
FSB-ის მონაცემებით, 2022 წელს რუსეთში მხოლოდ 72 ნეპალელი ტურისტი შევიდა, 2023 წელს უკვე 1039. დიდი ნაწილი 2023 წლის მეოთხე კვარტალში ჩავიდა – სამ თვეში 700-ზე მეტი ადამიანი.
2023 წლის დეკემბერში ნეპალმა სთხოვა რუსეთს, შეეწყვიტა თავისი მოქალაქეების ომში რეკრუტირება. მაშინ ქვეყნის საგარეო საქმეთა სამინისტრომ განაცხადა, რომ ექვსი ნეპალელი დაიღუპა უკრაინის ომში. მოგვიანებით ცნობილი გახდა, რომ ნეპალის ხელისუფლებამ რუსეთსა და უკრაინაში ქვეყნის მოქალაქეებისთვის სამუშაო ნებართვის გაცემა დროებით შეაჩერა.
