ცხინვალის მარიონეტული რეჟიმის ე.წ. სახელმწიფო უშიშროების კომიტეტმა “ფეისბუკის” საკუთარ გვერდზე გაავრცელა ცნობა, რომელშიც აღნიშნულია, რომ “სამხრეთ ოსეთის რესპუბლიკისა და საქართველოს სახელმწიფო საზღვრის მონაკვეთზე, ლენინგორის რაიონის დასახლებულ პუნქტ ახმაძთან, 13 ოქტომბერს სახელმწიფო საზვრის დარღვევის გამო მესაზღვრეებმა დააკავეს საქართველოს 2 მოქალაქე: ჩიტაშვილი დავით გელას ძე, 1993 წ. დაბადებული და ხუროშვილი თამაზ ივანეს ძე, 1978 წ. დაბადებული, კასპის რაიონის სოფელ ოკამის მაცხოვრებლები. 14 ოქტომბერს, ლენინგორის რაიონის სასამართლოს გადაწყვეტილებით, დაკავებულებს დაეკისრათ ადმინისტრაციული პასუხისმგებლობა ჯარიმის სახით, რომლის გადახდის შემდეგ ისინი საქართველოში გააძევეს.