როგორც იუწყება ცხინვალის მარიონეტული რეჟიმის ე.წ. სახელმწიფო უშიშროების კომიტეტის პრესსამსახური, “საზღვრის უკანონო გადაკვეთისთვის მესაზღვრეებმა უკვე მესამეჯერ დააკავეს საქართველოს მოქალაქე გენადი ბესტაევი. ეს უკანასკნელი გორის რაიონის სოფელ ზარდიანთკარის მკვიდრია. პირველად იგი ე.წ. მესაზღვრეებმა აგვისტოში დააკავეს, მეორედ კი – სექტემბერში. ორივე შემთხვევაში იგი გაანთავისუფლეს ჯარიმის გადახდის შემდეგ.
“მესამეჯერ ბესტაევი დაკავებულ იქნა 30 ოქტომბერს ცხინვალის რაიონის სოფელ ხელჩუას მიდამოებში. აღიძრა სისხლის სამართლის საქმე. 1 ნოემბერს სასამართლომ მას 2 თვით წინასწარი პატიმრობა შეუფარდა”, – იტყობინება ცხინვალის მარიონეტული რეჟიმის ე.წ. სახელმწიფო უშიშროების კომიტეტის პრესსამსახური.
