აშშ-ის პრეზიდენტის დონალდ ტრამპის განცხადებით, შარშან, ირანში ჩატარებული ოპერაციის შემდეგ ისინი გააფრთხილეს, რომ აღარ ეცადონ თავიანთი შეიარაღების პროგრამის აღდგენას, თუმცა აგრძელებენ და ამ ეტაპზე „კვლავ მისდევენ თავიანთ ბოროტ ბირთვულ ამბიციებს“.
კონგრესში, ყოველწლიური მიმართვის დროს ტრამპმა განაცხადა, რომ ირანს შეთანხმების დადება სურს, რათა თავიდან აიცილოს აშშ-ის შემდგომი დარტყმები, მაგრამ ჯერ არ აუღია ვალდებულება, რომ არასდროს შექმნის ბირთვულ იარაღს.
„ჩვენ მათთან მოლაპარაკებებს ვაწარმოებთ – მათ სურთ შეთანხმების დადება, მაგრამ არ მოგვისმენია ეს საიდუმლო სიტყვები: „ჩვენ არასდროს გვექნება ბირთვული იარაღი“. ამ პრობლემის დიპლომატიურად მოგვარებას ვამჯობინებ, მაგრამ ერთი რამ ცხადია: არასდროს დავუშვებ, რომ მსოფლიოში ტერორის ნომერ პირველ სპონსორს ბირთვული იარაღი ჰქონდეს“, – აღნიშნა ტრამპმა.
