რუსეთის პრეზიდენტ ვლადიმერ პუტინთან სატელეფონო საუბარში ჩინეთის ლიდერმა, სი ძინპინმა განაცხადა, რომ პეკინი მზადაა, უკრაინასთან დაკავშირებული კრიზისის მოგვარებას ხელი შეუწყოს, – ინფორმაციას რუსული მედია ავრცელებს.
„ყველა დაინტერესებულმა მხარემ უნდა გამოიჩინოს პასუხისმგებლური პოზიცია და ამით ხელი შეუწყოს უკრაინაში კრიზისის სწორად მოგვარებას“, – განაცხადა სი ძინპინმა და დასძინა, რომ ჩინეთი მზადაა, განაგრძოს კონსტრუქციული როლის შესრულება.
“ჩვენ აქტიური წვლილი შეგვაქვს გლობალური მასშტაბით მშვიდობის შენარჩუნებაში. ანალოგიურად, ჩვენ ხელს ვუწყობთ მსოფლიოში სტაბილური ეკონომიკური წესრიგის შენარჩუნებას”, – განაცხადა ჩინეთის პრეზიდენტმა.
მისი თქმით, პეკინი დამოუკიდებელ პოზიციას იკავებს უკრაინის საკითხზე, “ფაქტებისა და ისტორიული რეალობის გათვალისწინებით”.