19 იანვარს ერთი დღით გაიხსნება ოკუპირებული ახალგორის შესასვლელი. ეს გადაწყვეტილება ადგილობრივმა დე ფაქტო ადმინისტრაციამ მოსახლეობის თხოვნით მიიღო და სპეციალურ სიას ადგენს.
11 იანვრიდან, როცა ოკუპირებული ცხინვალის რეგიონის დე ფაქტო ხელისუფლებამ „ღორის გრიპის“ გამო დაკეტა დანარჩენ საქართველოსთან ე.წ. საზღვარი, დაბიდან გასვლას ვეღარ ახერხებენ ახალგორელი სტუდენტები, რომლებიც საქართველოს სხვადასხვა უმაღლეს სასწავლებლებში სწავლობენ.
ახალგორელმა სამოქალაქო აქტივისტმა, თამარ მეარაყიშვილმა რადიო თავისუფლებას უთხრა, რომ 20-მდე ახალგაზრდა ელოდება ე.წ. გამშვები პუნქტის გახსნას. გარდა ამისა, თბილისის მიერ კონტროლირებულ ტერიტორიაზე დარჩნენ ადამიანები, რომლებიც ახალგორის საბიუჯეტო ორგანიზაციებში მუშაობენ და სამსახურის გაცდენა უწევთ. ამიტომ დე ფაქტო ადმინისტრაციამ ე.წ. გამშვები პუნქტის ერთი დღით გახსნა გადაწყვიტა და 19 იანვარს ორმხრივი გადაადგილება შესაძლებელი იქნება სპეციალური სიით. თამარ მეარაყოშვილის ცნობით, დღის განმავლობაში მოქალაქეს მხოლოდ ერთხელ გადაადგილების უფლებას მისცემენ. წინასწარი ინფორმაციით, ოკუპირებული ახალგორი ჩაკეტილი იქნება კიდევ ერთი თვის განმავლობაში.
