ამერიკის პრეზიდენტის, დონალდ ტრამპის სპეციალურმა წარმომადგენელმა, პაოლო ძამპოლიმ FIFA-ს ოფიციალურად სთხოვა, ირანის ნაკრები ტურნირიდან მოხსნას და მისი ადგილი იტალიას დაუთმოს. ინფორმაციას Financial Times ავრცელებს.
“ეს ჩემი ოცნებაა. იტალიას ოთხი ტიტული აქვს და მათი ყოფნა ჩემპიონატზე აბსოლუტურად გამართლებულია”,_ აცხადებს ძამპოლი.
ინფორმაციისთვის, იტალიამ ზედიზედ მესამედ ვერ მოახერხა მუნდიალზე მოხვედრა მას შემდეგ, რაც პლეი-ოფში ბოსნია-ჰერცეგოვინასთან პენალტების სერიაში დამარცხდა.
ირანის ნაკრების მონაწილეობა კითხვის ნიშნის ქვეშ 28 თებერვალს დაწყებული ომის გამო დადგა. ირანის ფეხბურთის ფედერაცია (FFIRI) ითხოვდა მატჩების აშშ-დან მექსიკაში გადატანას, თუმცა FIFA-ს პრეზიდენტი ჯანი ინფანტინო ჯერჯერობით ურყევია.
„ირანი იქნება მსოფლიო ჩემპიონატზე და ითამაშებს იქ, სადაც წილისყრის მიხედვით უწევს“, — განაცხადა ინფანტინომ გასულ თვეში.
როგორც BBC წყაროებზე დაყრდნობით იუწყება, მიუხედავად აშშ-ის პრეზიდენტის სპეციალური წარმომადგენლის სკანდალური შეთავაზებისა, FIFA-ში აცხადებენ, რომ მსოფლიო ჩემპიონატზე ირანის იტალიით ჩანაცვლების გეგმა არ განიხილება.
